Այսօր «Սարդարապատ» շարժման նախաձեռնող խմբի ղեկավար Ժիրայր Սեֆիլյանը մեզ հետ զրույցում ահազանգեց, որ գոյություն ունի բռնատիրական վարչակարգի վերարտադրման ծրագիր, և համաներման հետ կապված այս ամբողջ թատերական գործընթացը պետք է դիտել այս տեսանկյունից:
«Որ բոլորիս ցանկությունն է քաղբանտարկյալներին տեսնել ազատության մեջ` փաստ է: Սակայն այն, ինչ տեղի է ունենում այսօր քաղաքական դաշտ կոչեցյալում՝ իրականության մեջ մեր ժողովրդի հետ կապ չունի: Ովքեր ունեն ինչ-որ պատրանքներ, որ այս ամենից հետո տեղի կունենա ինչ-որ լարման թուլացում՝ ժողովրդի և նրան կեղեքող համակարգի միջև, չարաչար սխալվում են: Ըստ էության, այդ երկխոսությունը, որ տեղի է ունենում և ապագայում շարունակվելու է, տեղի է ունենում ոչ թե ժողովրդի և ռեժիմի ներկայացուցիչների միջև, այլ ժողովրդի անունից խոսող մի շրջանակի, որն ըստ էության արդեն շեղվել է նախկինում իր հայտարարած ուղուց:
Ուստի, երբ ինձ որևէ մեկը հարց է տալիս, թե ընդդիմությունն առաջին հերթին որն է, իմ պատասխանը մեկն է՝ մեր ժողովուրդն է ընդդիմությունը, և որևէ քաղաքական միավոր չի կարող ասել, թե ես ընդդիմադիր եմ: Փաստացի ընդդիմությունը մեր ժողովուրդն է, և այս ամբողջ թատերական խեղկատակությունը, որին մենք ականատես ենք լինում և լինելու ենք, լարման ոչ մի թուլացում տեղի չի ունենալու երկրի ներսում»,- կարծիք հայտնեց Ժիրայր Սեֆիլյանը: