ՀՀԿ-ական պատգամավոր Կարեն Կարապետյանի առաջադրումը նույն ընտրատարածքում չի խանգարում ՀՀ ԱԺ ՀՀԿ խմբակցության ղեկավար Վահրամ Բաղդասարյանին. «Կարեն Կարապետյանն իմ մրցակիցը չէ։ Մենք մի թիմի անդամ ենք և ընդհանուր թիմի համար ենք պայքարում, որևէ խանգարող հանգամանք չեմ տեսնում», – ԱԺ ճեպազրույցների ժամանակ ասաց Վ. Բաղդասարյանը:
Դիտարկմանը, թե օրերս Կարեն Կարապետյանը նշել էր, որ իշխանության ներկայացուցիչ լինելը կարող է խոչընդոտել իրեն ժողովրդի քվեն ստանալ, քանի որ հանրությունը չի վստահում իշխանություններին՝ Վահրամ Բաղդասարյանը նշեց. «Նրա միտքն այն է, որ եթե կարծում եք` կան թերություններ, ապա մի ընտրեք իշխանությանը»։
Անդրադառնալով ԲՀԿ խմբակցության պատգամավոր Միքայել Մելքումյանի՝ ՀՀԿ-ին ուղղված քննադատությանը և հարցին՝ գալիս եք, որ ի՞նչ անեք, Բաղդասարյանը նշեց. «Գալիս ենք, որ կարգավորենք Միքայել Մելքումյանի երեխայի ապագան, որ դատարկ խոստումներ չտանք…»:
Վահրամ Բաղդասարյանն ընդամենը նախընտրական խոստումներ է համարում այլ քաղաքական ուժերի հայտարարությունները, թե իշխանության գալու դեպքում շեշտակի բարձրացնելու են աշխատավարձերն ու թոշակները։ Ազգային ժողովում խորհրդարանական ճեպազրույցների շրջանակում լրագրողների հետ հանդիպմանը Վահրամ Բաղդասարյանն ընդգծեց, որ Հանրապետականը ընտրություններին ընդառաջ ներկայացրել է իրատեսական և կայունացնող բյուջե, որովհետև չի ցանկանում խոստումներ տալ, որոնք հետագայում չի կարողանալու իրականացնել։
«Եթե մենք կառուցեինք նախընտրական բյուջե, դա ստահոդ բյուջե կլիներ, իսկ մենք ասել ենք, որ ընտրություններին ընդառաջ մենք բերում ենք ոչ թե նախընտրական, այլ կայունացնող բյուջե։ Իսկ այն գործիչները, ովքեր հայտարարում են, որ կարող են շեշտակի բարձրացնել թոշակներն ու աշխատավարձերը, բոլորն էլ հասկանում են, որ դրանք ընդամենը նախընտրական խոստումներ են»,- նշեց Բաղդասարյանը։
Նա հիշեցրեց, որ առաջիկա ընտրություններին մասնակցող քաղաքական ուժերից որոշները իշխանությունների հետ ճանապարհ են անցել, կոալիցիա են կազմել տարբեր տարիների։ Պատգամավորն այդ քաղաքական ուժերին խորհուրդ տվեց չմոռանալ անցյալը և կուրորեն չպայքարել Ազգային ժողով մտնելու համար։
Մանրամասները՝ տեսանյութում:
