ՍԴՀԿ ատենապետ Լյուդմիլա Սարգսյանը մեզ հետ զրույցում նշեց, որ շատ դրական է գնահատում համաներման փաստը, հատկապես, որ դրան սպասում էին:
«Վերջին շրջանում հատկապես այն 3 խնդիրները, որը ՀԱԿ-ը ներկայացրեց իշխանությանը, նրանց կողմից տեսանք տրամադրություններ, որ ցանկանում են այդ երեք կետերը կատարել մինչև վերջ: Հետևաբար սպասելի էր համաներումը, և կարծում եմ, որ շարունակությունը շատ ավելի հետաքրքիր է լինելու: Սակայն ներքաղաքական լարվածությունը չի կարող թուլանալ այնքան ժամանակ, քանի դեռ երկրում օրինականությունը չի հաստատվել, քանի դեռ իշխանությունները չեն նստել ընդդիմության հետ երկխոսության, քանի դեռ ժողովրդի տրամադրությունները հաշվի չեն առնվել, քանի դեռ սոցիալական վիճակը մնում է շատ ծանր և քանի դեռ հաշվի չեն առնվել, որ արտահերթ ընտրությունները անխուսափելի են:
Բայց վստահ եմ, որ երկխոսության արդյունքում մենք գալու ենք դրան, մոտ ապագայում կլինեն արտահերթ նախագահական և պառլամենտական ընտրություններ, որից հետո միանշանակ ներքաղաքական լարվածությունն էլ կթուլանա, հասարակությունն էլ կառողջանա, երկրի ապագան էլ ավելի տեսանելի կլինի և կշիռը կբարձրանա միջազգային ատյաններում: Հետևաբար միգուցե դանդաղ, բայց ուղիղ գնում ենք այդ նպատակին»,- ավելացրեց Լյուդմիլա Սարգսյանը: