«Օհանյան-Րաֆֆի-Օսկանյան» դաշինքին միացած Ժողովրդական կուսակցության նախագահ Տիգրան Կարապետյանը, ով առաջադրվել է Արարատի մարզից ռեյտինգային ընտրակարգով, «Առաջին լրատվական»-ի հետ զրույցում նշեց, որ դաշինքի ներսում խնդիրներ չկան, աղմուկը բարձրացնում է մամուլը:
Տիգրան Կարապետյանը բարդ ընտրապայքար է կանխատեսում: «Գնացել էի շրջաններ՝ հետազոտելու: Օրինակ՝ մի գյուղում մարզպետի եղբայրը առաջադրվել է ռեյտինգային ընտրակարգով, առաջադրվել են նաև նախկին ոստիկանապետ Ալիկ Սերգեևիչը, Հովիկ Աբրահամյանի որդին… ինչքան պաշտոնյա կա, մի գյուղի վրա վախեցնում-մախեցնում են, 100 դոլար են խոստանում, էս ի՞նչ ընտրություն ա, էս առուծախ ա, հայ ժողովրդին առնում են ուղղակի, սարսափելի բան ա»,- զայրացած նշեց Տիգրան Կարապետյանը:
Արարատի հարակից գյուղերում, նրա խոսքով, ամեն ինչ նույնն է, գյուղից մեկը, ով մեծ գերդաստան ունի, ունի առաջադրած թեկնածու, ու բոլորը հանրապետական են՝ բացառությամբ Արգամ Աբրահամյանի, ով առաջադրվել է «Ծառուկյան» դաշինքով:
Տիգրան Կարապետյանի դիտարկմամբ՝ ՀՀԿ-ն չի կարող պարտվել, եթե մի գյուղում տասը հոգի է առաջադրվում ՀՀԿ-ից. «Ես որևէ անգամ նման ընտրություն չեմ հիշում, սա խայտառակ ընտրություն է լինելու, և իշխանությունը կվերարտադրվի, բայց դրա մեջ իշխանության համար վտանգ կա, որ շանս չի տալիս ուրիշ կուսակցություններին՝ ինքը, ի վերջո, պարտվելու է: Դրա համար շանս պետք է տա»: Այնուամենայնիվ, անգամ այս դեպքում, ըստ նրա, կուսակցությունների մասնակցությունը ընտրություններին պարտադիր է, այլապես եթե երկու համապետական ընտրությունների կուսակցությունը չմասնակցի, նրան կմոռանան:
Նա նաև նշեց, որ այլ կուսակցություններին իշխանությունը պետք է հնարավորություն տա, այլապես եթե իշխանությունն այդ շանսը չտա, ֆորս-մաժորային իրավիճակ կստեղծվի:
