Շաբաթ օրը Լոնդոնի «Ուեմբլի» մարզադաշտում կրկին միմյանց կհանդիպեն «Բարսելոնա»-ի և «Մանչեսթեր Յունայթեդ»-ի գլխավոր մարզիչներ Պեպ Գվարդիոլան ու Ալեքս Ֆերգյուսոնը: Վերջին անգամ նրանք հանդիպել էին երկու տարի առաջ Հռոմում կայացած Չեմպիոնների լիգայի եզրափակչի ժամանակ:
Եթե Պեպ Գվարդիոլան «Բարսելոնա»-ի ղեկին ավարտում է իր երրորդ մրցաշրջանը, ապա նոյեմբերին բոլորելու է «Մանչեսթեր Յունայթեդ»-ի ղեկին Ալեքս Ֆերգյուսոնի գտնվելու 25-ամյակը:
Այդ շուրջ քառորդ դարում Ալեքս Ֆերգյուսոնը տպավորիչ արդյունքներ է արձանագրել: Շոտլանդացու գլխավորությամբ «Մանչեսթեր Յունայթեդ»-ը 25 տարում տիրացել է 36 տիտղոսի. 12 հաղթանակ Պրեմիեր լիգայում, 2-ը` Չեմպիոնների լիգայում, 9-ը` Անգլիայի սուպերգավաթում, 5-ը` Անգլիայի գավաթում, 4-ը` Անգլիայի լիգայի գավաթում, 2-ը` Աշխարհի ակումբային առաջնությունում, 1-ը` Գավաթակիրների գավաթում և 1-ը` Եվրոպայի սուպերգավաթում:
Այս հաղթանակների թվում կարելի է ընդգծել երեք անընդմեջ հաղթանակները Պրեմիեր լիգայում (2006-2007, 2007-2008, 2008-2009), ինչպես նաև 1998-1999 մրցաշրջանի եռակի հաջողությունը (Անգլիայի չեմպիոն ու գավաթակիր, Չեմպիոնների լիգայի հաղթող):
Ինչ վերաբերում է Պեպ Գվարդիոլային, ապա նա «Բարսելոնա»-ի մարզչական ղեկը ստանձնեց 2008 թվականի ամռանը: Այդ պահից սկսած` մրցաշրջանի արդյունքներով կապտա-նռնագույները ոչ մի անգամ չեն մնացել առանց տիտղոսի: Ընդհանուր առմամբ, Գվարդիոլան տիրել է 12 հնարավոր տիտղոսներից 9-ին:
Երիտասարդ մարզիչը «Բարսելոնա»-ի պատմության ընթացքում դարձավ առաջին մարզիչը, ում հաջողվեց մեկնարկից երեք անգամ հաղթել Պրիմերայում: Բացի այդ, նրա հաշվին է գրանցված 1 հաղթանակ Չեմպիոնների լիգայում, 1-ը` Իսպանիայի գավաթում, 2-ը` Իսպանիայի սուպերգավաթում, 1-ը` Եվրոպայի սուպերգավաթում, 1-ը` Աշխարհի ակումբային առաջնությունում:
Այս հաղթանակներից կարելի է ընդգծել 2008-2009 մրցաշրջանը, որում «Բարսելոնա»-ն եռակի հաջողություն արձանագրեց (Իսպանիայի չեմպիոն ու գավաթակիր, Չեմպիոնների լիգայի հաղթող), ինչին անմիջապես հաջորդեցին հաղթանակներն Իսպանիայի սուպերգավաթում, Եվրոպայի սուպերգավաթում ու Աշխարհի ակումբային առաջնությունում; Այս ռեկորդն անհնար է գերազանցել, այն կարելի է միայն կրկնել:
Այսպիսով, տիտղոսների միջին ցուցանիշով Գվարդիոլան գերազանցում է Ֆերգյուսոնին: Գվարդիոլան տարեկան նվաճում է միջինը 3 տիտղոս, մինչդեռ Ալեքս Ֆերգյուսոնի պարագայում այդ ցուցանիշը կազմում է 1.77:
