Հուլիսի 1-ից Ղազախստանում ուժի մեջ է մտել նոր Սահմանադրությունը, որի շուրջ հանրաքվե էր իրականացվել 2026 թվականի մարտին։ Երկրում առաջին անգամ Սահմանադրությունն ընդունվել է համազգային հանրաքվեով. դրա օգտին է քվեարկել քաղաքացիների 87,15%-ը։
Նոր Սահմանադրությամբ դադարելու է գործել երկպալատ խորհրդարանը, փոխարենը լինելու է միապալատ խորհրդարան՝ Քուրուլթայ, որը բաղկացած է լինելու 145 պատգամավորից։ Օրենսդիրների պաշտոնավարման ժամկետը լինելու է 5 տարի։
Նոր Սահմանադրությունը նախատեսում է նաև փոխնախագահի պաշտոնի ստեղծում, խորհրդատվական մարմինների բարեփոխում և այլ փոփոխություններ։
Ինչպես հաղորդում է Kazinform-ը, նոր մայր օրենքի ուժի մեջ մտնելու առթիվ ուղերձ է հղել երկրի նախագահ Կասիմ-Ժոմարտ Տոկաևը։ Նա շնորհավորել է ղազախստանցիներին «իսկապես դարակազմիկ իրադարձության» կապակցությամբ՝ նշելով, որ հանրաքվեում ժողովուրդը կատարել է ճակատագրական ընտրություն, որը տասնամյակներ շարունակ կսահմանի երկրի զարգացման ուղղությունները։
«Այսօր սկսվում է նոր դարաշրջան ինքնիշխան Ղազախստանի պատմության մեջ։ Մենք դուրս ենք գալիս առաջադեմ զարգացման, քաղաքական և տնտեսական բարեփոխումների, լայնածավալ արդիականացման հիմնական ուղու վրա», – ասվում է պետության ղեկավարի ուղերձում։
Օգոստոսին երկրում կանցկացվեն Քուրուլթայի առաջին ընտրությունները, որի արդյունքներով կձևավորվի երկրի նոր խորհրդարանը։
