Ադրբեջանի ներքաղաքական վերջին զարգացումների, նախագահական ընտրարշավին ընդդիմության միացյալ թեկնածուի չմասնակցելու և նախըտրական գործընթացների վրա դրա ազդեցության մասին խոսելիս ադրբեջանագետ Սարգիս Ասատրյանը լրագրողներին տեղեկացրեց, որ հոկտեմբերին կայանալիք ընտրություններին արդեն 12 թեկնածու կա գրանցված, այդ թվում` գործող նախագահ Իլհամ Ալիևը:
«Հիմնական ինտրիգը մտցնում է Ադրբեջանի դեմոկրատական ուժերի ազգային խորհուրդը, որը ստեղծվել է մարտի վերջին և միաձայն որոշում է ընդունել միասնական թեկնածու առաջադրել հայտնի կինոռեժիսոր Ռուստամ Իբրահիմբեկովին: Սակայն խնդիրները հետագայում ի հայտ եկան, որովհետև պարզվեց, որ Իբրահիմբեկովը երկքաղաքացի է` ունի Ադրբեջանի և ՌԴ քաղաքացիություն: Ըստ Ադրբեջանի Սահմանադրության` այս հանգամանքը թույլ չի տա նրան մասնակցել ընտրություններին»,- նշեց Սարգիս Ասատրյանը:
Նրա խոսքով` արդեն երկու ամիս է ընթանում է ՌԴ քաղաքացիությունից Իբրահիմբեկովի հրաժարման գործընթացը, ինչը նույնպես շատ հարցեր է առաջադրում, որովհետև լուրեր են տարածվում, որ նա վախենում է գնալ Բաքու: Մյուս կողմից` լուրեր են պտտվում, որ ուշացնում են ՌԴ քաղաքացիությունից զրկելու գործընթացը, որպեսզի Բաքվի վրա որոշակիորեն ճնշում գործադրեն:
«Վերջերս սենսացիոն նորություն տարածվեց նույն ադրբեջանական մամուլում, ըստ որի` Ռուսաստանի միգրացիոն ծառայությունը հայտարարություն է տարածել, որ Իբրահիմբեկովը օգոստոսի կեսերին է դիմել ՌԴ քաղաքացիությունից հրաժարվելու համար, այսինքն` նա դիմումը ներկայացրել է շատ ավելի ուշ, իսկ մենք գիտենք, որ փաստաթղթերի ընդունման գործընթացն ունի հստակ ժամկետներ, որը մոտենում է սպառվելուն»,- նշեց ադրբեջանագետը:
Նրա կարծիքով` փաստ է, որ այս խոսակցությունները տարաձայնություններ են առաջացնում հիմնական ընդդիմադիր ուժի շրջանում: Եթե այսօր ներքաղաքական դաշտում ինչ-որ մեկը կարող է դիմադրություն ցույց տալ գործող վարչակարգին, ապա դա Ազգային խորհուրդն էր, որն իր մեջ ներառել էր մի շարք ավանդական ընդդիմադիր կուսակցությունների:
«Արդեն խոսակցություններ են գնում, որ «Մուսավաթ» կուսակցությունը կփորձի նախագահի թեկնածու առաջադրել Իսա Ղամբարին: Սա նշանակում է, որ եթե այդ ուժերից մեկն առաջադրի իր թեկնածուին, ապա ընդդիմության ձայները կմասնատվեն»,- ասաց Սարգիս Ասատրյանը:
Ադրբեջանագետի կարծիքով` բացի Իլհամ Ալիևից, այնպիսի լուրջ ուժ, որ կարող է առանձին դիմադրություն ցույց տալ` չկա:
Լուսանկարը՝ PanARMENIAN Photo-ի
