Եվրամիության վիճակագրական վարչությունը տվյալներ է հրապարակել, որտեղ նշված է, որ 2016թ. օգոստոս-սեպտեմբեր ամիսներին 3 անգամ ավելի շատ ՀՀ քաղաքացի է առաջին անգամ ապաստան խնդրել Եվրոպայից, քան վերջին 9 տարիների միջին ամսական ցուցանիշն է։ Օգոստոսին՝ 1110 ՀՀ քաղաքացի է դիմել, սեպտեմբերին՝ 1185:
Թեմայի շուրջ «Առաջին լրատվական»- ի հետ զրույցում սոցիոլոգ Կարեն Սարգսյանը ներկայացրեց իր դիտարկումները: Սոցիոլոգի խոսքով՝ «Սասնա ծռերի» գործողությունների արդյունքում Հայաստանը հայտնվեց միջազգային լրահոսում, և որոշում կայացնող անհատների մոտ այլևս հարցեր չէին առաջանում, թե արդյո՞ք իսկապես խնդիրներ կան Հայաստանում. հեռուստացույցը միացնում և տեսնում էին, որ ոչ միայն քաղաքական, այլ նաև բավականին լուրջ սոցիալական խնդիրներ կան:
«Գիտե՞ք ինչ մասնագետներ են հեռանում Հայաստանից… Նրանք գնում են, որովհետև գիտեն՝ ինչ է սպասվում: Այստեղ համալիր պրոբլեմներ կան, դրանց մեջ առաջին հերթին մտնում է լիբերալ-դեմոկրատական բարեփոխումների բացակայությունը, ազատական տնտեսության տարրերի «խեղդումը», արտաքին քաղաքականության մեջ անիմաստ ու անհիմն քայլերը: Այն որ, Հայաստանը քուչիկի պես կողմ է քվեարկում Ռուսաստանի ցանկացած հիմար որոշմանը: Դա, բացի նրանից, որ վիրավորական է, լուրջ խնդիրներ է առաջացնում… Այն, որ շան մսի գնով «Պոբեդա»-ն ավիատոմսեր է ծախում դեպի Գյումրի, այսինքն՝ Հայաստանը սարքել են իրենց քրեական և աղքատ տարրերի համար «պռախադնոյ դվոռ», որ մարդը, ով անգամ սեփական կատու չունի, կարող է գալ Հայաստանում պերմյակովություն անել, հետ գնալ: Ի՞նչ պիտի անենք»,- նշեց Կ. Սարգսյանը:
Սոցիոլոգի կարծիքով՝ իշխանություններին արտագաղթը և այս խնդիրները չեն հուզում, չեն մտահոգում: Նրա խոսքով՝ իշխանությունները չեն կարողնում 15-20 տարվա պլանավորում կատարել:
Մանրամասները՝ տեսանյութում:
