Տրանսպորտի 100 դրամ ուղեվարձը չի ծածկում տրանսպորտային միջոցների ծախսերը: Օգոստոսի 23-ին հրավիրված մամուլի ասուլիսի ժամանակ Հայաստանի փոխադրողների միության նախագահ Հրանտ Եղիազարյանը նշեց, որ տրանսպորտային միջոցների լավ աշխատանք և բարձրակարգ տրանսպորտային միջոցներ ունենալու համար գուցե անհրաժեշտ է ուղեվարձը բարձրացնել: «Հավանական է՝ մոտ օրերս հանձնաժողով ստեղծվի, որում կընդգրկվեն նաև մեր միության անդամները, մարդիկ, ովքեր որ իրենց կաշվի վրա են զգում ուղեվարձի բարձր կամ ցածր նիշը: Հանձնաժողովի կողմից որոշման կայացումից հետո բոլորս կվարվենք ըստ համաձայն»,- ասաց նա: Դիտարկմանը, թե՝ հանձնաժողովի կողմից տրանսպորտի սակագինն անփոփոխ թողնելու որոշման պարագայում ինչպե՞ս կվարվեք, Եղիազարյանը պատասխանեց. «Շարժակազմը շարքից դուրս է գալիս, սայլերը բերում ենք, տեղափոխում ենք»: Նա խնդրեց փոխադրողներին իբրև թշնամի չընկալել. դրա արդյունքում արհեստածին ինչ-որ անջրպետ է առաջացել փոխադրողների և քաղաքացիների միջև: Հակառակ ուղեվարձի թանկացման հրամայականին տարիներ շարունակ գնի՝ անփոփոխ մնալու պատճառը, ըստ Եղիազարյանի, մեկն է. փոխադրողները ծառայում են ժողովրդին: Նրա խոսքով` իրենք ևս կողմ չեն թանկացումների:
«Արշակյան եղբայրներ» ընկերության տնօրեն Աշոտ Արշակյանի խոսքով` մատուցած ծառայությունների որակը բարձրացնելու համար անհրաժեշտ են համապատասխան միջոցներ: Նա նկատեց, որ իրենք արդեն հասել են խեղճ վիճակի, և «խեղճ գծատեր» արտահայտությունը կիրառել պետք: Արշակյանն ընդհանրապես դեմ է «Գծատեր» հասկացությանը, կարծում է, որ գծատեր չկա, գոյություն ունի երթուղիներ ունեցող հիմնարկ, որն ունի քաղաքի երթուղային ցանց, որը ղեկավարում է Երևանի քաղաքապետարանը: «Ողջ աշխարհում տրանսպորտի ոլորտը դիտվում է որպես վնասաբեր ոլորտ, և ոչ բիզնես: Արդեն իսկ հայտնվելով այս ոլորտում, ներդրումներ անելով, պատասխանատվությունից, ինչ-ինչ պատճառներից ելնելով՝ ստեղծել ենք ոլորտ և շարունակում ենք մնալ այնտեղ»,- ասաց նա:
Բանախոսները նշեցին, որ իրենք ևս թանկացումների կողմնակից չեն, իրենց ընտանիքի անդամները նույնպես օգտվում են հասարակական տրանսպորտից, այդուհանդերձ, դա արդեն հրամայական է դարձել:
Հիշեցնենք, որ Երևանում հուլիսի 20-ից, քաղաքապետի որոշմամբ, ուժի մեջ մտավ ավտոբուսների և միկրոավտոբուսների 150 դրամ ուղեվարձը` նախկին 100 դրամի փոխարեն, իսկ տրոլեյբուսների 100 դրամ ուղեվարձը` նախկին 50-ի փոխարեն: Տրանսպորտի ուղեվարձի թանկացումը հասարակական բողոքի ալիք առաջ բերեց. բազմաթիվ ակտիվիստներ սկսեցին պայքարել այդ որոշման դեմ: Արդյունքում Երևանի քաղաքապետ Տարոն Մարգարյանը կասեցրեց տրանսպորտի սակագնի թանկացման մասին որոշումը: Առաջիկայում կստեղծվի հանձնաժողով, որում կընդգրկվեն բոլոր շահագրգիռ կողմերը:
