Եգիպտոսում տեղի ունեցող իրադարձությունների հետևանքով հայկական համայնքին վտանգ չի սպառնում: Այս մասին օգոստոսի 23-ին լրագրողների հետ հանդիպմանը հայտնեց արաբագետ Սարգիս Գրիգորյանը: Նրա խոսքով՝ «Մուսուլման եղբայրներին» ձեռնտու չէ դավանաբանական լարվածություն առաջացնել և սրել իրավիճակը: «Այստեղ, կարծում եմ, այլ է խնդիրը: Նկատելի ոտնձգություններ կոնկրետ հայ համայնքում չկան, սակայն ոչինչ բացառել հնարավոր չէ: Նույնն է իրավիճակը նաև Սիրիայում»,- ասաց նա՝ նկատելով, որ այնտեղ ստեղծվել էին խմբավորումներ, որոնց միջև արդեն խմորումներ են նկատվում:
Իրավիճակն այս տարածաշրջանում բավական անկանխատեսելի է, հետևաբար զարգացումներն անվերահսկելի են դառնում՝ ոչ միայն տարածաշրջանում, այլև նրանից դուրս գտնվող, սակայն իրենց շահերն ունեցող երկրներում: «Ալ Քաիդան», կարելի է ասել, ուղղակի բրենդ է այն իսլամական խմբավորումների համար, որոնք համախմբվում և ակտիվ գործում են այս տարածաշրջանում»,- ասաց Գրիգորյանը:
Նրա խոսքով՝ Թուրքիան շահագրգռված է, որ Եգիպտոսի նախագահ Մոհամմադ Մուրսին շարունակի պաշտոնավարել. նրա հետ աշխատանքն ավելի արդյունավետ կլինի, նրա քայլերը՝ ավելի կանխատեսելի: Թուրքիան աջակցություն է հայտնում Մուրսիին՝ նրան ընդունելով իբրև ընտրված նախագահ, սակայն եթե գիտակցի, որ այլևս կանգնած է նոր իրականության՝ իշխանափոխության առաջ, պետք է հարմարվի նոր իրականությանը:
Արաբագետն անդրադարձավ նաև Եգիպտոսի կողմից Հայոց ցեղասպանության հարցի շահարկման փորձին: Նա նշեց, որ Հայոց ցեղասպանության խնդրի առումով պետք է զգայական ոլորտից դուրս գալ և ավելի պրագմատիկ լինել. դա են պահանջում նաև ներկա ազդակները: Եթե եղել է հաղորդագրություն, պետք է սպասել կոնկրետ քայլերի՝ արձագանքելու համար: Օգոստոսի 17-ին Եգիպտոսի ժամանակավոր նախագահ Ադլի Մանսուրը «Թվիթերում» հայտարարել է, որ իր երկրի «ՄԱԿ-ի ներկայացուցիչը ստորագրելու է միջազգային փաստաթուղթ հայկական ջարդերի ճանաչման մասին, որոնք իրականացվել են թուրքական բանակի կողմից, և որոնց հետևանքով մեկ միլիոն մարդ է սպանվել»:
Հիշեցնենք՝ Եգիպտոսում իշխանության կորստին չհամակերպվող իսլամիստները զանգվածային հակակառավարական ակցիաներ են կազմակերպում, որոնց ընթացքում արդեն հարյուրավոր մարդիկ են զոհվել:
Անդրադառնալով Սիրիայում տեղի ունեցող դեպքերին՝ Գրիգորյանը նշեց, որ նախագահ Բաշար Ասադը չի կարողանում վերահսկել իրավիճակը, և մտավախություն կա, որ դա կարող է արտաքին ուժերի համար հարմար առիթ դառնալ: «Նկատվում է հետաքրքիր միտում. իսլամական ծայրահեղական զանգվածները, որ ներխուժել են Սիրիա, պայքարում են անհասկանալի է՝ ինչի համար, արդեն տեղի բնակչության որոշ զանգվածների գրավել են, թեև, ինչ խոսք, կան նաև չեզոք տարրեր: Այս վերջինների կողմից եթե բողոքներ արտահայտվեն ցույցերի, ակտիվ գործողությունների միջոցով, կարծում եմ՝ Սիրիայի խնդիրներն ավելի շուտ կլուծվեն»,- ասաց նա:
ՄԱԿ-ի բարձրաստիճան դիվանագետ` ՄԱԿ-ի գլխավոր քարտուղար Պան Գի Մունի ներկայացուցիչ Անջելա Քեյնը, ուղևորվում Է Սիրիա՝ Բաշար Ասադի կառավարությանը համոզելու, որ Դամասկոսի արվարձանում ձեռնարկված քիմիական գրոհի վկայությունների ամբողջական հետաքննություն անցկացնեն: Նրան հանձնարարված է պարզել՝ խաղաղ բնակչության դեմ քիմիական զենքի կիրառման մասին լուրերը ճշմարի՞տ են արդյոք: Հաստատվելու դեպքում այն կդիտվի իբրև մարդկության դեմ կատարված հանցագործություն. գրոհի հետևանքով զոհվել են հարյուրավոր մարդիկ, այդ թվում՝ մեծ թվով երեխաներ:
Լուսանկարը՝ PanARMENIAN Photo-ի
