Ալմաթիում ընթացող ձմեռային համաշխարհային Ունիվերսիադայում փայլուն հաջողության է հասել Հայաստանի ներկայացուցիչ՝ դահուկորդ Սերգեյ Միքայելյանը: 10 կմ մրցատարածությունում հետապնդում ոճում Միքայելյանը 27 րոպե 4.5 վրկ արդյունքով նվաճել է բրոնզե մեդալ: Ի դեպ, Միքայելյանին հաջողվել է բրոնզե մեդալի համար դրամատիկ պայքարում հաղթել ֆրանսիացի ճանաչված դահուկորդ Ալեքսանդր Պույին, ինչպես նաև Ղազախստանի ներկայացուցիչ Վիտալի Պուխկալուին: Այս արդյունքով Միքայելյանը դարձել է Ունիվերսիադայի տղամարդկանց դահուկավազքի մրցումների հայտնությունը՝ հայտնվելով միջազգային ԶԼՄ-ների ուշադրության կենտրոնում: Նշենք նաև, որ մրցումը ընթացել է չափազանց վատ եղանակային պայմաններում. առատ ձյան և քամու հետևանքով դահուկորդներին մեծ դժվարությամբ է հաջողվել հաղթահարել մրցատարածությունը: Պաշտոնական արարողությունից հետո հայ դահուկորդը տպավորություններով կիսվել է Ունիվեսիադայի պաշտոնական կայքի թղթակցի հետ:
– Ինչպե՞ս հաջողվեց նման բարձր արդյունքի հասնել:
– Չափազանց ծանր և դժվար մրցում էր: Ես գործում էի իրավիճակից ելնելով: Պետք է խոստովանեմ, որ եթե Պույը լավ մարզավիճակում լիներ, դժվար թե ինձ հաջողվեր հաղթել նրան: Ինչ վերաբերում է Պուխկալուին, ապա մենք սահում էինք միասին՝ քայլ առ քայլ հետևելով ֆրանսիացի դահուկորդին: Մեզ ի վերջո հաջողվեց գերազանցել նրան: Երկրորդ շրջապտույտի ժամանակ հոգնեց նաև Պուխկալուն, և ինձ համար ստեղծվեց հրաշալի հնարավորություն կարևորագույն այս մրցաշարում մեդալ նվաճելու: Ինձ հաջողվեց երրորդ տեղը գրավել, և դա հրաշալի է: Ուզում եմ շնորհավորել նաև այս մրցումներում ոսկե և արծաթե մեդալներ նվաճած դահուկորդներին: Չեմ ցանկանում այսքանով բավարարվել և ամեն ինչ անելու եմ նոր հաջողությունների հասնելու համար:
– Ինչո՞ւ եք ընտրել հենց այս մարզաձևը:
– Մանկուց զբաղվել եմ դահուկային սպորտով: Դպրոց գնալուն պես եղել եմ դահուկների վրա: Ծնողներս նույնպես դահուկորդներ են: Մեր տարածաշրջանում՝ Աշոցքում, որը գտնվում է Հայաստանի հյուսիս-արևմուտքում, դահուկային սպորտը տարածված մարզաձև է:
– Մրցավազքի ժամանակ ինչի՞ մասին եք մտածում:
– Մրցումների ժամանակ մտածում եմ տեխնիայի մասին: Մարզումների ժամանակ էլ ձգտում եմ տեխնիկաս ավելի որակյալ դարձնել: Ուսումնասիրում եմ մրցատարածությունը և մշակում այն հաղթահարելու մարտավարություն: Պետք է հստակ պատկերացում ունենալ շրջադարձերի, բարձունքների և այլ մանրուքների վերաբերյալ: Պետք է նաև հաշվարկել՝ որտեղ խնայել ուժերը և երբ դրանք վատնել: Այս ամենը շատ կարևոր է:
– Ձեզ վրա ի՞նչ տպավորություն է թողել մարզահամալիրը, որտեղ տեղի է ունենում Ուինվերսիադան:
– Այս մակարդակի մարզահամալիր հազվադեպ կարելի է տեսնել: Նույնիսկ աշխարհի առաջնություններում ոչ միշտ է հանդիպում մրցավայր, որտեղ թունելով կարելի է դուրս գալ մեկնարկային հատված: Սա շատ հարմար է, կարելի է անմիջապես փոխել մարզահագուստը: Ստարտին սպասելիս չես սառչում, դա հրաշալի է: Բացի այդ, ինձ դուր եկավ նաև մրցատարածության որակը:
Նշենք, որ 10 կմ մրցատարածությունում հաղթող է դարձել Ռուսաստանի ներկայացուցիչ Դմիտրի Ռոստովցևը, ով Միքայելյանին գերազանցել է 52 վայրկյանով: Երկրորդ հորիզոնականը զբաղեցրել է ռուսաստանցի մեկ այլ դահուկորդ՝ Վալերի Գոնտարը՝ ցույց տալով 26 րոպե 27.2 վրկ ժամանակ: Միքայելյանի այս արդյունքը կարելի է բացառիկ համարել: Հայաստանցի մարզիկները ձմեռային մարզաձևերում հազվադեպ են հաջողությունների հասնում: Նրանց մասնակցությունը խոշոր մրցաշարերին արդեն իսկ հաղթանակ է որակվում: Միքայելյանը թերևս միակն է, ով տարեցտարի բարելավելով արդյունքները՝ արդեն իսկ արժանի պայքար է մղում բարձր հորիզոնականների համար: Հիշեցնենք, որ Միքայելյանը մասնակցել է նաև Վանկուվերի և Սոչիի Օլիմպիական խաղերին: Անցյալ տարի դարձյալ Ալմաթիում տեղի ունեցած մինչև 23 տարեկանների աշխարհի առաջնությունում Միքայելյանը գրավել էր 10-րդ տեղը, ինչը ևս բավական բարձր արդյունք է:
