ԱԺ ԲՀԿ խմբակցության պատգամավոր Վահե Էնֆիաճյանն այսօր, ելույթ ունենալով Մամուլի ազգային ակումբի և ԱՄՆ Ազգային ժողովրդավարական ինստիտուտի (NDI) կազմակերպած «Նոր քաղաքական լիդերների ձևավորման խոչընդոտները և հնարավորությունները Հայաստանում» քաղաքական քննարկմանը, խոսեց ԱԺ-ում ձևավորված երիտասարդական խորհրդարանի մասին և ընդգծեց, որ այն երիտասարդներին քաղաքական կյանքին մասնակցելու և ինքնադրսևորվելու հնարավորություն է տալիս:
Էնֆիաճյանը նաև տեղեկացրեց, որ ԲՀԿ-ն բավականին լայն գործունեություն է իրականացնում երիտասարդների հետ:
ԱԺ ՀՅԴ խմբակցության պատգամավոր Լիլիթ Գալստյանն էլ խոսեց ներկուսակցական ժողովրդավարության բացակայության մասին: Նա նշեց, որ Հայաստանում ոչ միայն ժողովրդավարություն չկա, այլ նաև ժողովրդավարություն չկա կուսակցությունների ներսում. «Այս հիբրիդային, օլիգարխիկ, մենատնտես համակարգում մենք անընդհատ բախվելու ենք այս խնդրի հետ: Ավելին՝ ժողովուրդն արդեն հոգնել է հայաստանյան քաղաքական դաշտում խաղացող նույն կուսակցություններից»:
Գալստյանը նաև անդրադարձավ միջազգային մի շարք կառույցների գնահատականներին` նշելով, որ խորհրդարանական երկրների թվում ժողովրդավարության մակարդակով Հայաստանը զբաղեցնում է 109-րդ տեղը:
««Էկոնոմիստի» վերջին համարներից մեկում Հայաստանի կառավարման համակարգը գնահատվել է որպես կիսահիբրիդային համակարգ, էլ չեմ խոսում մարդու իրավունքների պաշտպանության մասին, խոսքի ազատության սահմանափակումների մասին, երկրում թևածող կոռուպցիայի մասին»,- մանրամասնեց Գալստյանը:
