Կրթության և գիտության նախարարության շենքում այսօր տեղի ունեցավ մի խումբ ուսանողների և նախարար Արմեն Աշոտյանի հանդիպումը: Ուսանողները դժգոհում էին ուսման վարձերի բարձրացումից և հորդորում նախարարին՝ միջամտել և թվով 6 համալսարանների ռեկտորների կայացրած որոշումն ապօրինի համարել:
Նշենք, որ Ա․Աշոտյանը հորդորեց ուսանողներին իրենց առաջարկներն ու պահանջները ներկայացնել նաև գրավոր տարբերակով, ինչին նա ևս գրավոր պատասխան կտա:
Ա․Աշոտյանը զարմացած է, թե ինչու ուսանողները սկսեցին հենց հիմա բողոքի ակցիաներ կազմակերպել, չէ՞ որ որոշումը ապրիլ ամսին է եղել: Դրան ի պատասխան՝ ներկա ուսանողներից մեկը պատասխանեց, որ նախաքննական շրջան է եղել, և դրա ժամանակն իրենք չեն ունեցել:
Այնուհետև ԿԳ նախարարը տեղեկացրեց, որ ուսման վարձերի վճարների հետ մեկտեղ ավելանալու է մի շարք բուհերում զեղչերի և պետպատվերի քանակը:
Մի շարք ուսանողներ ևս ներկայացրին իրենց մտահոգություններն ու առաջարկները:
