«Անշուշտ, 2008-ի մարտիմեկյան իրադարձությունների հետևանքով անազատության մեջ գտնվողներից որոշ մասի վրա համաներումը տարածվելու է»,- Ազգային ժողովում լրագրողների հետ զրույցում նշեց ՀՀ արդարադատության նախարար Հրայր Թովմասյանը։ Նա դժվարացավ նշել, թե հստակ ում վրա կտարածվի այն, քանի որ հատուկ հաշվառում, որպես այդպիսին, չեն իրականացրել: Ըստ նրա՝ համաներման ակտը շատ ավելի լայն ընդգրկում ունի, քան այս պահին մեկ խնդիր լուծելը:
«Գիտեմ, որ որոշ մարդիկ ցանկանալու են համաներումը կապել բացառապես մարտիմեկյան իրադարձությունների հետ, բայց միշտ էլ համաներումն առավել ընդգրկուն է և միտված է ավելի մեծ խնդիրներ լուծելուն: Ինչպես նշել է հանրապետության նախագահը՝ բացի առկա խնդիրները լուծելուց, մենք ապագային նայելու և այդ ուղղությամբ քայլեր անելու խնդիր ունենք»,- ընդգծեց նախարարը: Վերջինս համաներման ակտը դիտարկում է լիցքաթափման, հանդուրժողականության մթնոլորտի ստեղծման տեսանկյունից, «այնպիսի մթնոլորտի, որի պարագայում միմյանց ոչնչացնելը չի դիտարկվում որպես խաղի հիմնական տարր»:
ՀՀ Ազգային ժողովի նախագահը դիմել էր ՀՀ նախագահին՝ մարտիմեկյան իրադարձությունների հետևանքով անազատության մեջ գտնվող Սասուն Միքայելյանին ներում շնորհելու խնդրանքով: «Ենթադրվում է համապատասխան այլ ընթացակարգ նրան ազատ արձակելու: Այս պարագայում պետք է դիտարկել ծանր հանցագործության, պատժի չափի կրած մասը և տեսնել՝ տարածվո՞ւմ է համաներումը Ս. Միքայելյանի նկատմամբ, թե՞ ոչ»,- ասաց Հ. Թովմասյանը:
Հավելենք, որ քիչ առաջ Հրայր Թովմասյանն առաջարկեց Ազգային ժողովի նախագահ Հովիկ Աբրահամյանին համաներման մասին օրինագիծը հետաձգել վաղվա նիստին: