Պաղեստինցի ծրագրավորող Խալիլ Շրիտեհը, ով Facebook-ում խոցելիություն էր հայտնաբերել և ցուցադրել դա սոցցանցի ղեկավար Մարկ Ցուկերբերգի էջը կոտրելով, 10 հազար դոլար կստանա իր ցանցահեն գործընկերներից:
Այս տեղեկությունը տեղադրվել է GoFundMe կայքի դրամահավաքի էջում՝ փոխանցում է RIA Novosti-ն:
Շրիտեհի նկատած խոցելիությունը թույլ է տալիս գրառումներ հրապարակել ցանկացած օգտատիրոջ պատին: Չնայած այն բանին, որ նա սխալն ի ցույց էր դրել օրինակով՝ Ցուկերբերգի քոլեջի դասընկերուհի Սառա Գուդինի էջում գրառում կատարելով, Facebook-ի վարչակազմը հերքել էր նրա հայտարարությունը: Այդ ժամանակ ցանցահենը խոցելիությունն ի ցույց էր դրել հաղորդագրություն տեղադրելով Ցուկերբերգի էջում:
Համացանցային հանրությունը որոշել է շտկել անարդարությունը, որը, նրանց կարծիքով, դրսևորվում է խոցելիություն հայտնաբերած ցանցահենին Facebook-ի ավանդական մրցանակային գումարի չվճարմամբ: Որպես կանոն՝ մրցանակը սկսվում է 500 դոլարից և աճում՝ կախված հայտնաբերված սխալի կարևորությունից:
