Դաշնակցությունը պատրաստվում է այսօր՝ օրվա երկրորդ կեսից կազմաքանդել իշխանական համակարգը: Ընդ որում՝ նրանք խոստանում են դա անել հենց նույն իշխանությունների ձեռքով:
Բանն այն է, որ այսօր խորհրդարանում պետք է քննարկվի ՀՅԴ խմբակցության՝ կառավարությանը ներկայացրած հարցապնդումը: Իսկ արդյունքում ՀՅԴ-ն պատրաստվում է անվստահություն հայտնել կառավարությանը, ընդ որում՝ դա անել հենց խորհրդարանական մեծամասնության միջոցով: Ի դեպ, ՀՅԴ-ն արդեն պատրաստել է կառավարությանն անվստահություն հայտնելու ԱԺ որոշման նախագիծը, և հիմա մնում է, որ այն ներկայացվի խորհրդարանին:
ԱԺ ՀՅԴ խմբակցության պատգամավոր Արա Նռանյանը մեզ հետ զրույցում ներկայացրեց, թե ինչու հենց իշխող մեծամասնության միջոցով են ցանկանում պաշտոնանկ անել կառավարությանը: Բանն այն է, որ իր հարցապնդման մեջ ՀՅԴ-ն բարձրացրել է կառավարության պատասխանատվության ներքո գտնվող 5 հարց, այդ թվում՝ հակաճգնաժամային քաղաքականության արդյունքները, գնաճի զսպման քաղաքականության ու երկրում տիրող արտագաղթի մասին: Կառավարության պատասխանները եղել են սպասվածից ավելին: Ավելի քան 20 էջանոց պատասխանում Տիգրան Սարգսյանի կառավարությունը ողջ մեղքը բարդել է նախորդ կառավարությունների վրա: Այլ կերպ ասած՝ Տիգրան Սարգսյանն արդարացել է, որ մեղավորը ոչ թե ինքն է, այլ՝ իր նախորդները՝ Անդրանիկ Մարգարյանն ու Սերժ Սարգսյանը:
«Այդ հարցապնդման պատասխանները շատ ավելի հարցեր են առաջացնում: Ընդ որում՝ համոզված եմ, որ կառավարության ներկայացրած պատասխանին ծանոթանալուց հետո այդ հարցերն առաջին հերթին կառաջանան հենց իշխող մեծամասնության մոտ»,- ասաց Արա Նռանյանը և հավելեց. «Այսինքն՝ պատասխանատվությունը դնում են այն կառավարության վրա, որի ներկայացուցիչները՝ նախկին նախարարները, այսօր ԱԺ պատգամավոր են, և թերացումների ողջ փաթեթ է ներկայացված այդ անձանց: Կառավարության մաս է կազմել նաև 2007-2008 թթ. վարչապետ Սերժ Սարգսյանը, որն այսօր զբաղեցնում է նախագահի պաշտոնը, ներկայիս ԱԺ նախագահ Հովիկ Աբրահամյանը, որը փոխվարչապետն էր: Կառավարության այս գործելաոճն արդեն ավանդույթ է դարձել. իր ձախողումների համար մեղավորներ է փնտրում ամենուր, բացի սեփական անձից: Այնպես որ, այս հարցապնդման քննարկումն ու մեր կողմից ներկայացվող ԱԺ որոշման նախագիծը կարող է լուրջ խնդիրներ առաջացնել նման քաղաքականության համար»,- ասաց պարոն Նռանյանը: Այլ կերպ ասած՝ ՀՅԴ-ն հույս ունի, որ Տիգրան Սարգսյանի ներկայացրած պատասխանները կզայրացնեն նախկին նախարարներ Հովիկ Աբրահամյանին, Կարեն Ճշմարիտյանին, Վարդան Այվազյանին, Դավիթ Հարությունյանին: Ու այդ դեպքում նրանք եթե անգամ չմիանան ՀՅԴ նախաձեռնությանը, այնուամենայնիվ, կփորձեն հաշիվներ պարզել Տիգրան Սարգսյանի հետ:
ԱԺ ՀՀԿ խմբակցության ղեկավար, ՀՀԿ փոխնախագահ Գալուստ Սահակյանը, սակայն, հանգիստ է վերաբերվում ՀՅԴ-ի՝ կառավարության հրաժարականի պահանջին: «Կառավարության հրաժարականի պահանջը կարող են և՛ այստեղ անել, և՛ փողոցում անել: Բայց կարծում եմ՝ հրաժարականի համար չկա քաղաքական պայման: Իրենց միտքը ոչ այնքան հրաժարականի պահանջը հաջողացնելն է, որքան ասելիք ունեն ու փորձում են հրապարակային դարձնել իրենց ասելիքը: Ես կարծում եմ՝ կառավարության ներկայացուցիչները կկարողանան պատասխանել նրանց բոլոր հարցերին»,- ասաց Սահակյանը: Ինչ վերաբերում է երկրում ստեղծված սոցիալ-տնտեսական ծանր վիճակին, ահռելի չափերի հասած արտագաղթին, Գալուստ Սահակյանն ընդունեց, որ խնդիրներ իրոք կան: «Շատ մեծ խնդիրներ կան, բայց նման հարցադրում կարող է անել այն քաղաքական ուժը, որը կարող ա իշխանության գալ ու մեկ-երկու օրում խնդիրները լուծել: Խնդիրն այստեղ ոչ թե լուծումների տարբերակն է, այլ՝ ևս մեկ անգամ կառավարությունը հասարակության առաջ կպատասխանի ՀՅԴ մտահոգություններին»,- նշեց Սահակյանը: Վերջինս ծիծաղելի համարեց կառավարության հրաժարականի պահանջը, առավել ևս՝ դրան ՀՀԿ մասնակցությունը:
Մինչդեռ Արա Նռանյանը իշխանություններին խորհուրդ տվեց նախ ծանոթանալ ՀՅԴ հարցապնդմանը կառավարության ներկայացրած պատասխանին, այնուհետև նոր համապատասխան եզրակացություն անել: «Երբ կհրապարակվի կառավարության պատասխանը, այդ ժամանակ նրանց կարծիքները կփոխվեն: Ու երբ այդ պատասխանում քաղաքական մեծամասնության ներկայացուցիչները տեսնեն իրենց, այդ ժամանակ նոր թող խոսեն»,- ասաց Նռանյանը:
«Ժամանակ» օրաթերթ
