ՀՀ ԱԺ նախագահ Գալուստ Սահակյանը հունվարի 18-ին ընդունել է ՀՀ-ում Բուլղարիայի Հանրապետության նորանշանակ արտակարգ և լիազոր դեսպան Մարիա Պավլովա Ցոցորկովա-Կայմակտչիևային: Այս մասին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից:
Շնորհավորելով դեսպանին պաշտոնի ստանձնման կապակցությամբ` խորհրդարանի ղեկավարը համոզմունք է հայտնել, որ նրա առաքելության ընթացքում հայ-բուլղարական հարաբերություններն էլ ավելի կզարգանան և կխորանան:
Գալուստ Սահակյանի խոսքով` երկու ժողովուրդների միջև վաղեմի բարեկամությունը, մշակութային բազմաթիվ առնչությունները նպաստավոր հիմք են հայ-բուլղարական հարաբերությունների զարգացման համար:
Երկկողմ հարաբերությունների ամրապնդման և համագործակցության խորացման տեսանկյունից ԱԺ նախագահը կարևորել է խորհրդարանական դիվանագիտության դերը, ինչպես նաև՝ Հայաստան-ԵՄ համագործակցությունը` Արևելյան գործընկերության շրջանակում:
Լեռնային Ղարաբաղի հակամարտության խաղաղ կարգավորման հարցում խորհրդարանի ղեկավարը կարևորել է Բուլղարիայի հավասարակշռված դիրքորոշումը` ԵԱՀԿ Մինսկի խմբի համանախագահների և ԵՄ դիրքորոշմանը համահունչ:
Դեսպան Մարիա Պավլովա Ցոցորկովա-Կայմակտչիևան, բարձր գնահատելով երկու երկրների միջև առկա հարաբերությունները, ուրախությամբ նշել է, որ Բուլղարիայի հայ համայնքը կամուրջ է երկկողմ հարաբերությունների սերտացման ու ամրապնդման հարցում: Նա վստահեցրել է, որ իր դիվանագիտական առաքելության ընթացքում կանի հնարավորը ձևավորված հարաբերություններն առավել զարգացնելու և խորացնելու համար:
Զրուցակիցները կարևորել են երկու խորհրդարանների բարեկամական խմբերի միջև սերտ աշխատանքն ու միջազգային տարբեր խորհրդարանական հարթակներում փոխգործակցության խորացումը:
Հանդիպմանը քննարկվել են երկկողմ հետաքրքրություն ներկայացնող հարցեր ևս:
