«Առաջին լրատվական»-ը ԱԺ ՀՀԿ խմբակցության քարտուղար Գագիկ Մելիքյանի հետ զրուցել է Գագիկ Ծառուկյանի՝ քաղաքականություն վերադարձի և 2017-ի խորհրդարանական ընտրություններին մասնակցելու հայտարարության շուրջ:
– Պարոն Մելիքյան, ԲՀԿ երբեմնի առաջնորդ Գագիկ Ծառուկյանը այսօր հայտարարեց, որ բացում է քաղաքականության փակված էջը: Ինչպե՞ս եք գնահատում նրա վերադարձը:
– ՀՀ ցանկացած քաղաքացու սահմանադրական իրավունքն է, ուրիշ ոչ մի բան: Մարդը ցանկություն ունի՞ քաղաքականություն վերադառնալու, թող վերադառնա, ի՞նչ խնդիր ունենք:
– Մրցակից համարո՞ւմ եք ՀՀԿ-ին:
– Տեսնում եմ, փոքր կամ մեծ, ուժեղ կամ թույլ՝ որևէ նշանակություն չունի: Իհարկե, մրցակից է:
– Գրեթե երկու տարի առաջ Գագիկ Ծառուկյանի հասցեին այլ գնահատականներ էիք հնչեցնում, նշում էիք, որ Սերժ Սարգսյանի ելույթը Ծառուկյանի մասին նույնիսկ ուշացած էր, որ բավականին տեղին էր: «Քաղաքական դաշտում ամեն ինչ դրվեց իր տեղում, կոչվեց իր անուններով: Թալանչին չի կարող բարերար լինել: ՀՀԿ-ն երբեք բյուջե չի թալանում, թալանում են նրանք, ովքեր հարկեր չեն վճարում»՝ ասում էիք Դուք: Հիմա է՞լ եք նույնը պնդում:
– 2015-ին են այդ գնահատականները տրվել, գնահատականները տրվել են երևույթներին: Հիմա տեսնում ենք մրցակցություն, մրցակցությունից երբեք չենք հրաժարվել: Ցանկացած քաղաքական ուժի հետ երբևէ մրցակցությունից չենք հրաժարվել: Մրցակցության շրջանակներում մենք մեր համապետական ընտրական գործընթացը կիրականացնենք: ՀՀԿ-ն ամենաազդեցիկ ուժն է, ընտրություններին էլ ունենալու է բացարձակ մեծամասնություն, մենք ունենք մեր ընտրազանգվածը, որն ամենամեծն է հանրապետությունում: Առաջիկայում մենք դա կտեսնենք:
– Գագիկ Ծառուկյանի հասցեին հնչած գնահատականները մնում են անփոփո՞խ, թե՞ Դուք վերանայել եք ձեր մոտեցումները:
– Ես ասացի, որ դրանք եղել են գնահատականներ երևույթներին:
– Եթե Գագիկ Ծառուկյանը իշխանության համար վտանգ ներկայացնի, նույն կերպ կգնահատե՞ք, ինչպես Դուք եք ասում՝ երևույթներին:
– Ես չեմ կարծում, որ քաղաքականության մեջ վտանգներ կան: Համենայնդեպս, այս պահին որևէ վտանգ չկա, կա քաղաքական արդար մրցակցության, արդար նախընտրական գործընթաց իրականացնելու խնդիր, պահանջ, որը ցանկանում ենք իրականացնել:
– Համագործակցություն այդ գործչի հետ պատկերացնո՞ւմ եք:
– Քաղաքականության մեջ ցանկացած քաղաքական գործչի կամ ուժի հետ հնարավոր է համագործակցություն:
– Մամուլը գրում է, որ իշխանությունն է այսպիսի խաղի կանոններ սահմանում:
– Մամուլին ուղղված հարցերը ուղղեք մամուլին: Քաղաքականության մեջ համագործակցությունը երբևէ որևէ մեկը չի բացառում:
– Ծառուկյանը նշում է. «Իմ որոշումից հետո քաղաքական դաշտում առաջացած բացը ոչ մի քաղաքական ուժ և գործիչ այդպես էլ չկարողացավ լրացնել»: Համամի՞տ եք:
– Յուրաքանչյուրն արտահայտում է իր կարծիքը: Ցանկացած քաղաքական ուժ, ցանկացած քաղաքական միավոր, ցանկացած քաղաքական գործիչ համապետական ընտրություններում կարող է մրցակից լինել ՀՀԿ-ին: Եվ մենք այդպես էլ դիտարկելու ենք: Եվ կարծում եմ, որ կլինի: Հավասար մրցապայքարում էլ կընթանա այդ գործընթացը: Ժողովուրդն ում առավելությունը կտա, նա էլ կլինի առաջատարը: Կարծում եմ, ինչպես միշտ, ինչպես վերջին բոլոր համապետական ընտրություններում, առաջատարը լինելու է ՀՀԿ-ն:
– Պատրա՞ստ եք ապրիլի երկուսին իշխանությունը տալ այլ քաղաքական ուժի:
– Իշխանությունը մենք չենք տվողը, իշխանությունը տվողը ժողովուրդն է, ժողովրդին հարցրեք:
– Հարցումները ցույց են տալիս, թե ինչ վերաբերմունք ունի ժողովուրդը, կա անվստահություն, ատելություն:
– Ժողովուրդը Հանրապետականի նկատմամբ շատ բարձր դրական վերաբերմունք ունի: Կգա ընտրությունների պահը՝ կտեսնեք: ՀՀԿ-ն ունի հստակ ընտրազանգված, և կարծում եմ՝ նա ամենամեծն է հանրապետությունում: Ժողովուրդը միշտ բարձր է գնահատում, աշխատանք կատարվում է:
– Եթե իսկապես լայն կոնսոլիդացիա լինի, դարձյա՞լ մտավախություն չեք ունենա իշխանության կորստի:
– Ոչ, ոչ, ոչ…
– Կարծում եք՝ հաղթելո՞ւ եք:
– Իհարկե… Բոլորս միասին:
