Ռուսաստանն իր հարևան Ուկրաինայի նկատմամբ տնտեսական պատժամիջոցներ է կիրառում՝ ըստ երևույթին, ԵՄ-ի հետ Ասոցացման համաձայնագիրը կնքելու համար: Եթե սկզբում ՌԴ-ն արգելեց ուկրաինական Roshen ապրանքանիշի քաղցրավենիքի ներմուծումը Ռուսաստան, ապա հետագայում պաժամիջոցներն էլ ավելի խորացան:
«Առաջին լրատվական»-ի հետ զրույցում Ուկրաինայի Ալեքսանդր Ռազումկովի անվան տնտեսական և քաղաքական հետազոտությունների կենտրոնի («Ռազումկովի կենտրոնի») փոխտնօրեն, Ուկրաինայի ԱԳ նախկին փոխնախարար, քաղաքական վերլուծաբան Վալերի Չալին ևս նշեց,որ պատժամիջոցները կիրառվում են, որպեսզի ԵՄ-ի հետ Ասոցացման համաձայնագիր ստորագրելու փոխարեն Ուկրաինան անդամագրվի Մաքսային միությանը․ «Իսկապես, այսօր Ռուսաստանի կողմից տնտեսական մեթոդներով ճնշում է գործադրվում Ուկրաինայի վրա: Այդ ճնշումը սկսվեց հուլիսի սկզբից, և նախնական շրջանում մի քանի արտահանողների վրա էր ճնշում գործադրվում, իսկ հիմա Ուկրաինայից Ռուսաստան ամբողջ արտահանումը ռիսկի տակ է: Դե ֆակտո տուժում են ոչ միայն Ուկրաինայի արտահանողներն, այլ նաև ռուսական ընկերությունները, որովհետև հաճախ այդ արտահանումն իրականացվում էր ռուսական տրանսպորտի միջոցով»:
Մեր զրուցակիցը նշեց նաև, որ Ուկրաինայի և՛ քաղաքական, և՛ փորձագիտական դաշտում այս կապակցությամբ բազմաթիվ քննարկումներ են անցկացվել և միանշանակ եկել են այն եզրակացության, որ այս ամենը պայմանավորված է Ուկրաինայի՝ ԵՄ-ի հետ Ասոցացման համաձայնագիրը նոյեմբերին ստորագրելու ցանկությամբ։ «Ուկրաինայի ԶԼՄ-ները հրապարակել են միջոցառումների ցանկը, որոնց ընթացքում ուսումնասիրվելու են այն մեխանիզմները, որոնք հիմա մեր հարևան երկրի կողմից օգտագործվում են Ուկրաինայի քաղաքական գործիչների, Ուկրաինայի նախագահի վրա: Ինչպես էլ դա կոչվի՝ առևտրական պատերազմ, թե Մաքսային միությանն անդամագրելու պարտադրանք, Ուկրաինայում այն ընդունում են որպես հարևան պետության կողմից տնտեսական ճնշում: Հիմա կան խմբեր, որոնք իրավիճակից դուրս գալու ելքեր են փնտրում»,- նշեց նա:
Վալերի Չալին նաև նշեց, որ մի կողմից ստեղծվել են հատուկ աշխատանքային խմբեր իրավիճակից դուրս գալու ելքեր փնտրելու համար, մյուս կողմից էլ՝ Ուկրաինան պատրաստում է Առևտրի համաշխարհային կազմակերպություն բողոք ներկայացնել․«Թեև փաստաթղթերում կա ամրագրված, որ չի թույլատրվում տնտեսական ճնշումն Ուկրաինայի վրա, առայժմ ոչ մի արդյունք, ցավոք սրտի, չկա»:
Մեր այն հարցին, թե հնարավո՞ր է այս տեսակ պատժամիջոցներ կիրառվեն նաև Հայաստանի նկատմամբ, եթե հաշվի առնենք, որ գրեթե նույն ճանապարհով էլ Հայաստանն է գնում, Վ․ Չալին պատասխանեց. «Հայաստանի դեպքում կասեմ հետևյալը՝ կան տնտեսական սեկտորներ, որտեղ կա մեծ կախվածություն ՝ռուսական շուկա ապրանք արտահանելու իմաստով, և փոխադարձ ներմուծում Ռուսաստանից։ Դա մեխանիզմ է էներգետիկ և տնտեսական ճնշման տեսքով, դա այն է, որից Ռուսաստանն օգտվում է իր արտաքին քաղաքականությունն իրականացնելու համար։ Ես չեմ կարող բացառել ոչինչ: Մյուս հարցն այն է, որ պետք է ցանկացած դեպքում՝ կլինի դա Ռուսաստանի, թե ցանկացած այլ երկրի կողմից, պատրաստ լինել:
Ես, որպես խորհուրդ, Հայաստանի ընկերներիս կասեմ հետևյալը՝ ունեցեք առաջիկայի հաշվարկ, հակաճգնաժամային ծրագիր, որովհետև չնայած որ Ուկրաինային այդ ծրագրերի մասին վաղուց էր հայտնի, նախարարությունների արձագանքը բավականին դանդաղ է: Պետք է պատրաստ լինել իրադարձությունների ցանկացած շրջադարձի, իհարկե՝ ավելի կարևոր է պատրաստվել, քան հետո փաստի առաջ կանգնել»:
