Միջազգային իրավապաշտպան Human Rights Watch կազմակերպությունը բոլոր միջազգային ֆինանսական կառույցներին կոչ է արել որևէ աջակցություն ցույց չտալ Ադրբեջանի կառավարությանը՝ մարդու իրավունքների զանգվածային ոտնահարումների ու ընդդիմախոսների համատարած հետապնդման համար:
Կազմակերպությունն արձանագրել է, որ 2016 թվականին ևս Ադրբեջանի իշխանությունները շարունակել են իրավապաշտպանների, ակտիվիստների և լրագրողների, ընդդիմադիր քաղաքական գործիչների հետապնդումները, որոնցից շատերին տարբեր շինծու մեղադրանքներով ազատազրկման են դատապարտել երկրի ղեկավարությանը քննադատելու համար: Ադրբեջանում ընդունված մի շարք խտրական ու սահմանափակող օրենքներ, ըստ կազմակերպության, գրեթե վերջ են դնում անկախ միավորումների գոր ծունեությանը երկրում:
«Համաշխարհային բանկը, Վերակառուցման և զարգացման եվրոպական բանկը, ինչպես նաև այլ ֆինանսական կառույցներ պետք է ձեռնպահ մնան Ադրբեջանի կառավարությանն ուղղակի բյուջետային աջակցություն ցույց տալուց, մինչև որ իշխանություններն անկախ խմբերին ու անհատներին թույլ չտան մասնակցել երկրի զարգացման ծրագրերին և ազատ կարծիքներ հայտնել պետական գործերի վերաբերյալ»,- նշվում է կազմակերպության կոչում:
Վերը հիշատակված ֆինանսական կառույցների ընտրությունը պատահական չէ. ամիսներ առաջ Ադրբեջանի իշխանությունները վարկ տրամադրելու խնդրանքով դիմել էին Համաշխարհային բանկին ու Վերակառուցման ու զարգացման եվրոպական բանկին:
