«Առանց տարածաշրջանային քաղաքականության անհնար է պատկերացնել ԱՄՆ արտաքին քաղաքականությունը»,- «Առաջին լրատվական»-ի հետ զրույցում ասաց քաղաքագետ Իգոր Մուրադյանը՝ անդրադառնալով Դոնալդ Թրամփի կողմից ԱՄՆ նախագահի պաշտոնը ստանձնելուց հետո, մասնավորապես, Հարավային Կովկասում ԱՄՆ քաղաքականության մեջ տեղի ունենալիք փոփոխություններին:
Քաղաքագետի խոսքով՝ Միացյալ Նահանգներում տեղի է ունեցել ոչ մեծ հեղափոխություն. «Իսթեբլիշմենթը, քաղաքական էլիտան հանդես է եկել որոշակի գաղափարախոսության օգտին, որը պաշտպանում էին Օբաման և Հիլարի Քլինթոնը: Սակայն Ամերիկան հենվում է այլ գաղափարախոսության վրա՝ ավելի եսասիրական: Ամերիկացիներին հոգնեցրել են դեկլարատիվ գաղափարները»:
Ինչպես նկատեց քաղաքագետը, Օբաման արտաքին քաղաքականության մեջ փորձեր արեց, սակայն որևէ էական բան չձեռնարկեց, և դրա արդյունքները կորստաբեր էին, ուստի ԱՄՆ նախագահ ընտրվեց ինչ-որ չափով դեմագոգ մի մարդ. «Արդյունքում հաղթեցին Սպիտակ Ամերիկան, միջին դասը և գլխավորը՝ ռազմաքաղաքական շրջանակները: Եվ Թրամփը ստիպված կլինի կատարել իր խոստումները, բայց թե որքանով դրանք կիրագործվեն՝ պարզ չէ»:
Ինչ վերաբերում է Հարավային Կովկասին, ապա Իգոր Մուրադյանի կարծիքով՝ Հարավային Կովկասը չի լինի պայքարի, դիսկուրսների հիմնական դաշտ: «Սակայն ծագել է այլ դաշտ՝ Սևծովյան-Կովկասյան տարածաշրջանը: Ռուսները հույս ունեն, որ ամերիկացիները կհրաժարվեն այդ գաղափարից, սակայն այդպես չի լինի:
ԱՄՆ-ի առջև կանգնած է կոնկրետ խնդիր՝ վռնդել ռուսներին Հայաստանից: Դա անպայման տեղի կունենա, թե երբ՝ չգիտեմ: Ընդ որում, դա կանեն մարդիկ, որոնք վերջին 20-30 տարիներին հանդես են եկել ռուսների դեմ: Այստեղ ոչ մի անսպասելի բան տեղի չի ունենա»:
Իգոր Մուրադյանի կանխատեսմամբ՝ Թրամփը լուրջ դերակատարում չի ունենա արտաքին քաղաքականության մեջ. դրանով կզբաղվեն երկու խմբավորումներ՝ այսպես կոչված, ռեալիստները և նեոպահպանողականները:
Մանրամասները՝ տեսանյութում:
