«Առաջին լրատվական»- ի զրուցակիցն է ԱԺ պատգամավոր, «Լուսավոր Հայաստան» կուսակցության խորհրդի նախագահ Էդմոն Մարուքյանը:
-Պարոն Մարուքյան, Սուրբ Ծննդյան պատարագին Գուգարաց թեմի առաջնորդ Սեպուհ եպիսկոպոս Չուլջյանը կոչ է արել Վանաձորի ընդդիմադիր ավագանիներին դադարեցնել բոյկոտն ու մասնակցել նիստերին: Ինչպե՞ս կմեկնաբանեք այս կոչը, և որո՞նք են լինելու ձեր քայլերը:
-Մենք ասել ենք, որ եթե Վանաձորի ավագանու հանրապետական փոքրամասնությունը կարողանա քվորում ապահովել և նիստ գումարել, ապա մենք կմասնակցենք, բայց մեր հաշվին այդ քվորումը չեն կարող ապահովել: Իրենք իրենց համար 4 մարդ են գտել, ովքեր քվեարկել են, բայց այդ 4 հոգուց գոնե 2-ին չեն կարողանում բերել ու նիստ գումարել: Նրանք ծպտված հանրապետականներ են, որոնք չեն կարողանում բացահայտվել: Դա իրենց խնդիրն է, ասում են՝ ունենք մեծամասնություն, դե թող այդ մեծամասնությամբ նիստ գումարեն:
Ինչ վերաբերում է սրբազանի կոչին, ապա պետք է նշեմ, որ հիասթափված եմ այդ կոչից: Մեծ հաշվով սրբազանը մեր աչքերում կորցրել է անաչառ դիտորդ լինելու հանգամանքը, այն բանից հետո, որբ նա առանց որևէ կերպ կապվելու ընդդիմադիր խմբակցությունների հետ, առանց նրանց կարծիքը լսելու գնաց և մասնակցեց մանդատագողությամբ ընտրված քաղաքապետի երդմնակալությանը և օրհնեց այդ ապօրինի միջոցառումը: Դրանից հետո կոչ անել ընդդիմադիր խմբացություններին, կարծում եմ, օբյեկտիվ և անաչառ չէ, միակողմանի է: Մենք դա ի գիտություն ենք ընդունում և շարժվում ենք առաջ մեծ ծրագրերով: Ճիշտ է, սրբազանը Գուգարաց թեմի առաջնորդն է, և մենք շատ սիրում ենք մեր թեմը և մեր եկեղեցին, Հայ առաքելական եկեղեցու հետևորդ ենք , բայց գտնում ենք, որ կրոնական առաջնորդները չպետք է միջամտեն քաղաքական գործընթացներին և այդ կոչումը չպետք է օգտագործեն որևէ քաղաքական ուժի քարոզը տանելու համար: Երեկվա կոչը հենց դրան էր միտված:
-Կարո՞ ղ ենք ասել, որ Հանրապետական կուսակցությունն արդեն փրփուրներից է կախվում, որ եկեղեցու միջոցով է փորձում հասնել իր նպատակին:
-Այդպես է դուրս գալիս: Ամեն մեթոդ կիրառում են, որն իրենց եղած վիճակն էլ ավելի է բարդացնում:
-Դուք պատրաստվում էիք դիմել կառավարությանը Վանաձորի ավագանին լուծարելու և նոր ընտրությունների անցկացնելու համար: Ձեր որոշումն ուժի մե՞ջ է:
-Եթե մինչև հունվարի 10-ը չկարողանան նիստ գումարել, ապա լրանում է քաղաքապետի անգործության 3 ամիսը, մենք օրենքով սահմանված կարգով կդիմենք մյուս երկու ընդդիմադիր խմբակցություններին, որ միասնական դիմում ներկայացնենք հանրապետության կառավարությանը և պահանջենք կիրառել օրենքը, որտեղ ասվում է, որ եթե երեք ամիս անընդմեջ նիստեր չեն գումարվում, ապա կառավարությունը կարող է կրճատել ժամկետը:
-Այսինքն՝ դեռ չե՞ք դիմել մյուս երկու խմբակցություններին, նրանց կարծիքը հայտնի՞ է: Կարծում եք կաջակցե՞ն ձեզ:
-Ժամկետը լրանա՝ կդիմենք: Մեզ աջակցելու խնդիր չկա, ընդդիմադիր սկզբունքը պահելու խնդիր կա: Եթե չմիանան էլ՝ մենք առանձին կդիմենք:
-Իսկ կառավարությունից ակնկալիքներ ունե՞ք:
-Վարչապետի համար սա լուրջ մարտահրավեր է՝ որպես նոր վարչապետ: Սա փոքր հարց չէ՝ Հայաստանի երրորդ քաղաքի հարցն է: Կա՛մ իրենք իրենց կուսակցության ներսում պետք է քննարկեն ու քաղաքապետը հրաժարական տա, կա՛մ պետք է այդ զոռբայությունը պահեն ու հասնեն նրան, որ ժամկետը լրանա ու օրենքով արդեն լիազորությունները դադարեցվեն:
