Արաբական պետությունների առաջնորդներն աջակցել են Սաուդյան Արաբիայի թագավոր Աբդալլահի դիրքորոշմանը, որը հանդես է եկել հօգուտ Եգիպտոսի ժամանակավոր կառավարության ձեռնարկած միջոցների` երկրում կարգուկանոն հաստատելու նպատակով: Այս մասին հաղորդում է Interfax-ը:
Թագավորը հեռուստատեսությամբ ելույթ ունենալիս կողմ է արտահայտվել «ահաբեկչության դեմ պայքարում» կոշտ գործողություններին, որը վարում են Եգիպտոսի ներկայիս իշխանությունները: Աբդալլահը դեմ է նաև արտաքին միջամտությանը Եգիպտոսի ներքին գործերին:
Սաուդյան Արաբիայի թագավորի այս հայտարարությանն աջակցել են Արաբական Միացյալ Էմիրությունները և Բահրեյնը, որն ընդգծել է, որ Եգիպտոսի կառավարությունը իրավունք ունի վերականգնելու երկրի կարգուկանոնը, պայքարելու ահաբեկչության և բռնության դեմ:
Քուվեյթի ԱԳՆ ներկայացուցիչը նշել է, որ իր պետությունն աջակցում է Եգիպտոսի իշխանությունների ձեռնարկած գործողություններին, որոնց նպատակն է պահպանել անվտանգությունը և կայունությունը:
Սաուդյան Արաբիայի թագավորին իր զորակցությունն է հայտնել նաև Հորդանանը:
