Արդյոք Հայաստանը կստորագրի՞ սնդիկի օգտագործումը սահմանափակող կոնվենցիան, որը հայտնի է որպես Մինամատայի կոնվենցիա: Այս թեման լրագրողների հետ քննարկեցին «Հայ կանայք հանուն առողջության և առողջ շրջակա միջավայրի» հասարակական կազմակերպության անդամները:
«Հայ կանայք հանուն առողջության և առողջ շրջակա միջավայրի» ՀԿ-ն կատարել է հետազոտություն սնդիկի հնարավոր ռիսկերի վերաբերյալ: Ըստ այդ հետազոտության` Հայաստանում սնդիկի քանակությունը նորմայից բարձր չէ, բայց հայտնաբերվել է: Ըստ նույն ՀԿ-ի անդամ Քնարիկ Գրիգորյանի` սնդիկի նորմայից բարձր չլինելը դեռևս ապահովագրություն չէ, սնդիկն իրենից ներկայացնում է կայուն ախտոտիչ, օրգանիզմում կուտակվելով առաջացնում է բազմաթիվ ախտահարումներ:
«Սնդիկը միայն Հայաստանի հիմնախնդիրը չէ: Այն օրգանիզմում վերածվում է մեթիլ սնդիկի, որն ավելի վտանգավոր է, քան մետաղական սնդիկը: Եթե արդյունաբերական կեղտաջրերը թափվում են բաց ջրամբարներ, ծովեր, օվկիանոսներ, գետեր, լճեր, հետագայում դրանք օգտագործվում են բակտերիաների կողմից, անցնում փափկամարմինների, որոնք էլ սննդային շղթայով անցնում են ձկներին, իսկ ձկներով սնվում են կաթնասունները, այդ թվում՝ մարդիկ»,- ասաց Քնարիկ Գրիգորյանը:
Առաջին անգամ սնդիկից թունավորում արձանագրվել է 1956 թ. Ճապոնիայի Մինամատա քաղաքում, երբ եղան դեպքեր, որոնց բժիշկները չէին կարողանում պատասխան տալ։ Հետագայում պարզվեց, որ տասը հազար մարդ թունավորվել է մեթիլ սնդիկով։ Պատճառն այն է եղել, որ ացետիլեն արտադրելիս օգտագործել են սնդիկի սուլֆիդ, որի հետևանքով առաջացած մեթիլ սնդիկը կեղտաջրերի հետ թափվել է ծովախորշ։ Ձկներով սնվելով՝ մարդիկ թունավորվել են, անգամ մահվան դեպքեր են եղել:
Հայաստանում աղտոտման հիմնական աղբյուրները, ըստ բժիշկ-փորձագետ Քնարիկ Գրիգորյանի, հանքարդյունաբերությունն է: Ուսումնասիրությունների արդյունքում պարզվել է, որ սնդիկի քանակություն կա նաև Հայաստան ներկրվող եվրոպական կոսմետիկայում, մանկական խաղալիքներում, մանկական շրթներկերում։ Այլ ծանր մետաղներ են հայտնաբերվել տասը խաղալիքներում, որից իննը չինական, մեկը` հայկական արտադրության է եղել:
«Այս տարվա հունվարին Ժնևում ՄԱԿ-ի կողմից ընդունվեց Մանամատայի կոնվենցիան՝ որպես միջազգային, իրավականորեն պարտավորեցնող փաստաթուղթ: Հիմնական նպատակն այն է, որ ամբողջ աշխարհում կարողանան վերացնել սնդիկի առաջացրած վտանգը մարդու առողջության վրա»,- նշեց Էմմա Անախասյանը:
Նա հույս հայտնեց, որ Հայաստանն էլ կմիանա կոնվենցիային:
