Դարակերտի դպրոցի 6-րդ դասարանի աշակերտ Գևորգ Սարուխանյանի մայրը՝ տիկին Գայանեն, պնդում է, որ ուսուցչուհին հանձնարարությունը չկատարելու համար պատժել է աշակերտին` հարվածելով գլխին, ինչի հետևանքով երեխայի աջ աչքի տեսողությունը տուժել է 90 տոկոսով:
Տիկին Գայանեն «Ազատություն» ռադիոկայանի հետ զրույցում ասել է, որ այցելել են Մալայանի անվան ակնաբուժական կենտրոն, որտեղ էլ բժշկուհին ասել է, թե հարվածի հետևանքով մահացել է աչքը սնուցող նյարդը՝ ինչը հնարավոր չէ վերականգնել:
«Ազատություն» ռադիոկայանի հետ զրույցում ուսուցչուհին՝ Սուսանա Գալոյանը, հերքել է իրեն ուղղված մեղադրանքներն ու նշել է, որ ինքը երբևէ երեխաներին՝ հատկապես Գևորգին, չի հարվածել, իսկ իր հասցեին ուղղված բոլոր մեղադրանքները որակել է որպես հեյրուրանք:
«Ես պատիվ եմ պահանջելու ․․․»,- ասել է ուսուցչուհին:
Ակնաբուժական կենտրոնի տմնօրեն Ալեքսանդր Մալայանը «Ազատություն» ռադիոկայանին փոխանցել է, որ իրենք իրավունք չունեն որևէ նման եզրակացություն ներկայացնել, եթե իրենց գրավոր չեն դիմել ոստիկանությունից, դատարանից կամ դատախազությունից:
Երեխայի մայրը պատմել է, որ դեպքի մասին տեղեկանալուց հետո ուսուցչուհին այցելել է երեխային, ընդունել, որ իր հարվածի հետևանքով է երեխայի տեսողությունը վնասվել և առաջարկել է իր օգնությունը: Գալոյանը չի հերքում իր այցելության մասին տեղեկությունն ու պնդում է, որ որպես գյուղացի է այցելել երեխային և առաջարկել իր օգնությունը:
Ծնողները նշում են, որ այսօր երեխայի առօրյան գլխի վայր շուռ է եկել, ստիպված է արևային ակնոց կրել և օրվա ընթացքում հսկայական քանակով դեղեր է ընունում: Ծնողները դիմում են Կրթության և գիտության նախարար Արմեն Աշոտյանին` պահանջելով, որպեսզի 40 տարվա աշխատանքային փորձ ունեցող ուսուցչուհին հեռացվի աշխատանքից:
Կրթության և գիտության նախարարության հանրակրթության բաժնի պետ Նարինե Հովհաննիսյանն «Ազատություն» ռադիոկայանին փոխանցել է, որ նախարարությունը սպասում է ոստիկանության պատասխանին:
