Հորդանանի հատուկջոկատայինները Էլ-Կարակ քաղաքում գրոհով վերցրել են զինյալների կողմից զավթված միջնադարյան ամրոցը։ Այս մասին հայտնում է Al Arabiya հեռուստաալիքը։
Բոլոր պատանդները, որոնց թվում եղել են օտարերկրացիներ, ազատ են արձակվել։
Անհայտ զինված անձիք ողջ օրը հարձակումների շարք էին իրականացրել անվտանգության պարեկային խմբերի վրա, կրակ բացել ուժային կառույցների տեղի վարչության ուղղությամբ։ Այնուհետև նրանք պատանդներ էին վերցրել զբոսաշրջիկների շրջանում հայտնի խաչակիրների ամրոցում և մի քանի ժամ շարունակ դիմակայություն ցույց տվել իրենց շրջապատած իրավապահներին։
Հաղորդվում է 9 զոհի մասին։ Նրանցից 5-ը իրավապահներ են, 3-ը՝ տեղացիներ։ Զոհերի թվում կա մեկ կանադացի զբոսաշրջիկ, ով փոխհրաձգության ժամանակ կրակի տակ է հայտնվել։ Տարբեր տվյալներով՝ վիրավորվել է 30 մարդ։
