Այսօր Vedomosti թերթը հրապարակել է մանրամասներ Ռուսաստանի առաջատար բանկերից «Սբերբանկի» և հայազգի գործարար Ռուբեն Վարդանյանի «Տրոյկա դիալոգ» ներդրումային ընկերության միջև կնքված գործարքի վերաբերյալ: Հիշեցնենք, որ «Սբերբանը» գնել է այդ ընկերությունը, և այդ մասին վերջնական որոշում կայացվել է 2011 թ. մայիսի 19-ին:
Ըստ ռուսական թերթի, Գերման Գրեֆի գլխավորած բանկը «Տրոյկա»-ի գնման գումարը կվճարի 3 տարվա ընթացքում: Սակայն պայմանագրում նշված է, որ եթե Գերման Գրեֆը հրաժարական տա, ապա «Սբերբանկը» պարտավոր է «Տրոյկայի» համար նախատեսված ողջ գումարը միանգամից վճարել: Vedomosti-ն գրում է, որ թեև Գրեֆի պայմանագիրն ավարտվում է այս տարի, սակայն բանկի ղեկավարությունը գոհ է նրա աշխատանքից և կերկարացնի այն:
Ըստ այդ պայմանագրի, որը վերջնականապես ստորագրվելու է մայիսի 25-ին, «Սբերբանկն» անմիջապես «Տրոյկայի» բաժնետերերին կվճարի 1 միլիարդ դոլար, որից հետո երեք տարի կվճարվի ևս 700 միլիոն, եթե «Տռոյկայի» եկամուտները տարեկան կազմեն 175 միլիոն դոլար:
Նախատեսվում է նաև, որ «Տրոյկայի» ողջ ղեկավարությունը առաջիկա երեք տարիների ընթացքում կպահպանվի:
