Սիրիայում, որտեղ արդեն երկու ամիս է՝ չեն դադարում հակակառավարական ելույթները և արյունալի բախումները, մեծ հույսեր են կապում Ռուսաստանի հետ, որը պետք է աջակցի նրանց ՄԱԿ-ում: Այս մասին երեկ հայտարարել է Սիրիայի արտաքին գործերի նախարար Վալիդ Մուալլիմը Սիրիայի հեռուստատեսությանը տված հարցազրույցում:
«Մենք Ռուսաստանի դիրքորոշման հետ մեծ հույսեր ենք կապում»,- ասել է նա: Նրա կարծիքով Ռուսաստանը կարող է կիրառել վետոյի իրավունքը, եթե ՄԱԿ-ի անվտանգության խորհրդում Սիրիայի հարցով բանաձև ներկայացվի: «Ես հարց ունեմ այն երկրներին, որոնք վետոյի իրավունք ունեն. Արդյո՞ք նրանք պատրաստվում են այս թեման թողնել արևմտյան ուժերի լիակատար տնօրինմանը»,- Չինաստանին և Ռուսաստանին այսպիսի հարց է ուղղել Մուալլիմը` միանգամից պատասխանելով, որ «շատ կասկածում է»:
Մուալլիմը քննադատել է Եվրամիության կողմից նախագահ Ասադի նկատմամբ կիրառված պատժամիջոցները. «Եվրամիության պատժամիջոցները տեղավորվում են ուժի կիրառման տրամաբանության մեջ և ոչ մի օրինական հիմք չեն պարունակում»,- հայտարարել է նախարարը: Նա կարծիք է հայտնել, որ Արևմուտքի գործողությունները հետապնդում են միայն մեկ նպատակ` «թուլացնել Սիրիան»:
«Ես մտահոգություն չունեմ, քանի որ այս միջոցները կրում են քաղաքական և տնտեսական բնույթ և չեն հանգեցնի ռազմական միջամտության»,- ասել է Մուալլիմը` ավելացնելով, որ իրենք ձգտելու են բարելավել հարաբերությունները Ռուսաստանի, Չինաստանի, Վենեսուելայի և Ասիայի մի շարք երկրների հետ` ապացուցելու, որ աշխարհը միայն Ամերիկան և Արևմուտքը չէ: Այս մասին հաղորդում է ITAR-TASS գործակալությունը: