Գերմանացի քաղաքական գործիչներն ավելի ու ավելի աշխուժորեն են քննարկում 2014 թ. Սոչիում կայանալիք Օլիմպիադան բոյկոտելը՝ կապված ՌԴ-ի ընդունած նոր օրենքի հետ, որն արգելում է անչափահասների մեջ ոչ ավանդական սեռական կողմնորոշման քարոզչությունը:
«Այն, ինչ տեղի է ունենում Ռուսաստանում, հետապնդում է պետության կողմից: Այդ օրենքի մասին քննարկումները բնակչության որոշ խմբեր ընդունել են որպես համասեռամոլների նկատմամբ «որս» սկսելու կոչ: Իրերի նման դրությունն անընդունելի է»,- ասել է ԳԴՀ կառավարության մարդու իրավունքների հանձնակատար Մարկուս Լենինգը, հաղորդում է Welt am Sonntag պարբերականը:
Ըստ գերմանացիների՝ միջազգային օլիմպիական կոմիտեն պետք է ճնշում գործադրի ռուսական իշխանությունների վրա, որպեսզի նրանք ապահովեն ոչ ավանդական սեռական կողմնորոշում ունեցող մարզիկների անվտանգությունը, ովքեր պետք է մասնակցեն Օլիմպիադային:
ԳԴՀ արդարադատության նախարար Սաբինե Լոյտհոյսեր-Շնարենբերգերը հայտարարել է, որ անհանգստացած է գործերի նման դրությամբ, քանի որ և՛ համասեռամոլների մեկուսացումը, և՛ բոյկոտը, նրա խոսքերով, ոչ մի լավ բան չեն խոստանում Սոչիի օլիմպիական խաղերին:
