Քրդական Fırat լրատվական գործակալության փոխանցմամբ, թուրքական ընդդիմության առաջնորդ, «Ժողովրդա-հանրապետական» կուսակցության (ԺՀԿ) ղեկավար Քեմալ Քըլըչդարօղլուն իր նախընտրական կամպանիայի շրջանակներում այցելել է երկրի հարավարևելյան քրդաբնակ շրջաններ:
Ամենաարևելյան ու անկայուն Հաքքարի շրջանում Քըլըչդարօղլուն հայտարարել է, որ հունիսի 12-ին կայանալիք խորհրդարանական ընտրություններում իրենց կուսակցության հաղթանակի դեպքում ԺՀԿ-ն խորհրդարանում կնախաձեռնի տեղական ինքնակառավարման մասին օրինագիծը, որն ընդունված է եվրոպական բազմաթիվ երկրներում:
Նա նաև խոստացել է, որ ԺՀԿ հաղթանակի դեպքում յուրաքանչյուր նահանգ կունենա սեփական կառավարություն: Իսկ Վանում կայացած հանդիպման ժամանակ Քըլըչդարօղլուն նշել է, որ Էրդողանի գլխավորած «Արդարություն և զարգացում» կուսակցության կառավարման ժամանակաշրջանում քրդաբնակ շրջաններում կառուցվել են 49 նոր բանտեր:
Ընդդիմության առաջնորդը նշել է, որ ինքը կլուծի «Քրդական հարցը»՝ հիշեցնելով Էրդողանի այն խոսքերը, թե Թուրքիայում «Քրդական հարց» գոյություն չունի:
Հիշեցնենք, որ Թուրքիայի Հանրապետության հիմնադիր Մուսթաֆա Քեմալ Աթաթուրքի հիմնադրած ԺՀԿ-ն ընտրություններից առաջ շեշտը դրել է քրդական գործոնի վրա՝ հրապարակելով «Արևելյան ու Հարավարևելյան Անատոլիայի զարգացման» նախագիծը, որում քրդերին խոստանում էր.
ա) քրդաբնակ արևելյան ու հարավարևելյան շրջանների նկատմամբ ճնշումների վերացում և համընդհանուր խաղաղության հաստատում,
բ) «Քրդական հարցի» բացառապես ժողովրդավարական կարգավորում,
գ) նախընտրական 10 տոկոսանոց արգելքի նվազեցում,
դ) չլուծված խնդիրների և անհետ կորածների վերաբերյալ հանձնաժողովների ստեղծում, մեղավորների պատժում,
ե) ԵԽ-ի պահանջով տեղական ինքնակառավարման մարմինների բարեփոխում,
զ) հատուկ լիազորություններ ունեցող դատարանների վերացում,
է) 1980 թվականի սեպտեմբերի 12-ի ռազմական հեղաշրջման մեղավորների պատժում,
ը) որպես համընդհանուր խաղաղության օրինակ՝ Դիարբեքիրի բանտի վերածում թանգարանի,
թ) «Գյուղական պահապանների» համակարգի վերացում,
ժ) մայրենի լեզվով ուսուցման թույլտվություն, մշակութային ձուլման վերացում, մշակութային արժեքների նկատմամբ հարգանքի ցուցաբերում,
ժա) մինչև 2023 թվականը քրդաբնակ շրջաններում 9.5 տոկոսանոց տնտեսական աճի արձանագրում, 365 միլիարդ դոլարի ներդրում:
