Համաշխարհային բանկի միջոցներով Ազգային Ժողովի նիստերի օվալաձև դահլիճում տեղադրվել է օդափոխության համակարգ, որը կհովացնի պատգամավորներին: Հովացնելն իհարկե շատ էր պետք՝ խեղճերը քափ ու քրտինք կտրած աշխատում են պետության համար և, բնականաբար, մի քիչ հովանալու կարիք ունեն: Ու եթե օդափոխության համակարգը գործի, ապա Ազգային ժողովի դերը ուղղակի կայծակնային արագությամբ կբարձրանա, և պատգամավորները Հայաստանը ուղղակի կողողեն հանրահաճ օրենքներով: Այս ամենն իհարկե կատակով, որովհետև եթե լուրջ խոսենք այս իրողության մասին, ապա սա հերթական ցինիզմն ու աչքակապությունն է, որ մատուցվում է հասարակությանը:
Բանն այն է, որ եթե Ազգային ժողովի խորհրդարանական մեծամասնության գրպանները թափ տրվեն, ապա ամեն մեկի գրպանից գուցե մի ամբողջ օդափոխության համակարգի գումար թափվի: Սակայն ԱԺ պատգամավորները իրենց գումարներն ուղղում են ոչ թե ԱԺ օդափոխությանը, այլ սեփական ստամոքսի նյութափոխանակությանը՝ իրենց ճոխ «պերերիվներով»: Իսկ ԱԺ օդափոխության համակարգի համար գումարներ է հատկացնում Համաշխարհային բանկը: Պարզ չէ՝ Համաշխարհային բանկը որպես օգնությո՞ւն է տալիս այդ գումարները ԱԺ-ին, թե՞ վարկով, սակայն իհարկե սա կարևոր չէ: Եթե սա վարկ է, իհարկե, ուրեմն պարզապես զարհուրելի է, երբ միլիոնատերերը վարկ են վերցնում պետության անունից, որ իրենց կոմֆորտը հոգան: Սակայն եթե նույնիսկ սա ընդամենը օգնություն է, ապա Համաշխարհային բանկի այդ օգնությունը կարելի էր ուղղել հայաստանյան որևէ անապահով խավի օգնելուն, թեկուզ մի քանի ընտանիքի, թեկուզ մի քանի անապահով ուսանողի ուսման վարձը հոգալուն, մի քանի երեխայի առողջության:
Մի խոսքով, Հայաստանում ԱԺ օդափոխության համակարգի գումարներով կարելի էր շատ ու շատ սոցիալական առավել կարևոր ու կենսական հարցեր լուծել, քան հանրապետական ճարպակալած մեծամասնության կոմֆորտի խնդիրը: Բայց արի ու տես, որ այդ խնդիրն է համարվում առաջնային, և Համաշխարհային բանկից օգնությունը գնում է այս խնդրի լուծմանը, այն դեպքում, երբ դահլիճում, որտեղ ներդրվում է այդ համակարգը, առնվազն 50 տոկոսը ուղղակի միլիոնատերեր են, ընդ որում՝ դոլարով, ոչ թե դրամով: Ըստ որում, հենց այս միլիոնատերերն են, որ ամենից շատ բողոքում էին իբր թե շոգից կամ խեղդոցից, որովհետև ընդդիմության աշխատող պատգամավորները երբեք չեն տրտնջացել պայմաններից, և օդափոխության համակարգի բացակայությունը նրանց երբեք չի խանգարել՝ լիարժեք կատարելու պատգամավորի պարտականությունները:
Լուսանկարը՝ PanARMENIAN Photo-ի
