Բոլոր տեսակի ուսումնասիրությունները և ՀՀ-ում, և ՀՀ-ից դուրս ցույց են տալիս, որ մինչև աշուն հայաստանյան ժողովուրդն ինքնակազմակերպվելու է տարբեր խնդիրների շուրջ: Այս մասին այսօր «Առաջին լրատվական»-ի հետ զրույցում ասաց Մոսկվայի «Միաբանություն» հայկական ազգային ակումբի նախագահ Սմբատ Կարախանյանը՝ անդրադառնալով այս օրերին ազատամարտիկների որդեգրած պայքարին և «Վճարենք 100 դրամ» քաղաքացիական նախաձեռնության պայքարին:
Նա նշեց,, որ նախկինում կանխատեսում էր այն, ինչ այսօր տեղի է ունենում Երևանում՝ ապակենտրոն քաղաքացիական ընդվզումների ալիքներ: Ըստ նրա՝ հնարավոր չէ, որ այդ ալիքները չուժեղանան, ավելին՝ դրանք շարունակվելու են ապակենտրոն քաղաքացիական պայքարի նոր մեթոդներով, իսկ հին մեթոդները նոր հնարավորություններին չեն կարողանում դիմակայել: Պարզապես, Կարախանյանի խոսքով, արտագաղթի ահագնացող ծավալների պայմաններում այս ընդվզումները շատ ավելի սակավամարդ են:
«Պայքարների ցանկը գնալով մեծանալու և ընդլայնվելու է, մարդիկ հասնելու են լոկալ հաղթանակների՝ լոկալ հարյուրավոր պայքարներ ծավալելու միջոցով: Բոլորը շատ լավ հասկանում են, որ իշխանությունները ստեղծում և ստեղծելու են իրենց խմբերը այդ օջախներում, քաղաքացիական շարժումներում, իրենց ականներն են ներդնելու և փորձելու են դրանք կառավարելի դարձնել, նույնիսկ օլիգարխներն են հակակշիռներ ստեղծում, պայքարի ուղիներ ստեղծում մեկի մյուսի դեմ: Այդ ամենը բնական է՝ պետք է լինի, բայց ի վերջո գալու է քաղաքական պլատֆորմի վրա, որով վերադառնալու ենք սահմանադրական կարգի վերականգնմանը և քրեաօլիգարխիկ ուժային կառույցի ոչնչացմանը, քանի որ առանց այդ կառույցը ջարդելու հնարավոր չէ առաջ ընթանալ, իսկ այդ ամենի հիմքը պետք է լինեն քաղաքացիական և քաղաքական պայքարի ակտիվությունները: Իհարկե՝ աշնանը դրանք ավելի կակտիվանան, և այդ պայքարների ցանկը կմեծանա»,- մեկնաբանեց Սմբատ Կարախանյանը՝ հավելելով, որ իշխանությունն ականներ է ներդնում, բայց ամեն ինչ արդեն շարժման մեջ է, քնած վիճակից դուրս է եկել, և ընդհանուր առմամբ այս ամենը հնարավոր չէ երկար ուղղորդել:
Անդրադառնալով «Ժառանգություն» կուսակցության առաջնորդ Րաֆֆի Հովհաննիսյանի՝ կլոր սեղանի առաջարկին՝ նա ասաց, թե չի կարծում, որ պետք է լուրջ բան ակնկալել այդ նախաձեռնությունից: «Գաղափարը լավն է, սակայն այսօր հիմք չկա կլոր սեղանի, քաղաքական պլատֆորմ չկա Րաֆֆի Հովհաննիսյանի ասածի մեջ: Այսինքն՝ գաղափարը ինքնին լավն է, բայց անցած ճանապարհը ցույց է տալիս, որ հերթական անլուրջ վերջաբանն է ունենալու: Եթե իշխանության աջակցությունն էլ հանենք, կմնա 0+1: Դրանով կվերջանա, բայց արդյունք չի լինի, լուրջ քաղաքական ուժեր չեն նստի կլոր սեղանի շուրջ»,- նկատեց նա:
