«Առաջին լրատվականը» տեղեկացրել էր, որ Միսսուրի նահանգի Ջոփլին քաղաքում տեղի ունեցած մրրկահողմի հետևանքով կան ավերածություններ: Մենք հաղորդել էինք 30 զոհի մասին: Սակայն, ինչպես հաղորդում են ամերիկյան լրատվամիջոցները, այդ թիվն արագորեն աճում է: Associated Press գործակալության փոխանցմամբ, այս պահի դրությամբ Ջոփլին քաղաքում զոհվել է 89 մարդ:
Հարյուրավոր տներ ավերվել են, մեծ վնաս է հասցվել տեղի հիվանդանոցին: Տուժել են նաև Վիսկոնսին և Մինեսոտա նահանգները: Վիսկոնսին Լա Քրոսս քաղաքում քշվել են տների տանիքներ: Փրկարարական աշխատանքները շարունակվում են: