Շահումյանում, Մարտակերտում, Քարվաճառում Լեոնիդ Ազգալդյանի հրամանատարության ներքո մարտական ուղի անցած ազատամարտիկ, պահեստազորի գնդապետ, ազատամարտիկների սոցիալական խնդիրների պայքարի ակունքում կանգնած Վոլոդյա Ավետիսյանը վաղը չի մասնակցելու Ազատության հրապարակում ազատամարտիկ Խաչիկ Ավետիսյանի գլխավորությամբ հրավիրվող հանրահավաքին: Այս մասին նա ասաց «Առաջին լրատվական»-ի հետ զրույցում:
Նա նշեց, որ ինքն ու իր ընկերները, որոնք կազմում են ՀՀ ազատամարտիկների մոտ 80 %-ը, շարունակում են պայքարել ազատամարտիկների իրավունքների պաշտպանության համար` բոլոր խոշոր քաղաքներում նստացույցեր կազմակերպելով, իսկ վաղը կայանալիք հանրահավաքին ինքը չի միանում, քանի որ «հանրահավաքի օրակարգում ժողովրդի հարցերի լուծումն է»:
«Հիմա այդ մարդիկ ժողովրդին են ուզում հանել ոտքի, իրենց իրավունքն է՝ թող ժողովրդին հանեն ոտքի, ժողովրդի հարցերը լուծեն: Ուղղակի իրենք այլ կերպ են մտածում, ես՝ այլ կերպ: Ես ի սկզբանե, երբ եկել եմ նստել եմ Ազատության հրապարակում, հարցը դրել եմ կոնկրետ մեր՝ ազատամարտիկների վիճակի վրա, նրանց խնդիրն եմ բարձրացրել և այդ ճանապարհից չեմ շեղվել, թեև եղել են շատերը, որոնք փորձել են ինձ ևս շեղել»,- մեկնաբանեց Վոլոդյա Ավետիսյանը՝ հավելելով, որ այս ամենն ուղղորդվում է ռուսական կողմնորոշում ունեցող ուժերի կողմից: Ըստ նրա՝ այդպիսի կողմնորոշում ունի նաև Ազատության հրապարակում հացադուլ հայտարարած Խաչիկ Ավետիսյանը:
Վոլոդյա Ավետիսյանի համոզմամբ՝ «այս քամին փչում է Ռուսաստանից», և ինքը չի ուզում իր նախնական ուղուց շեղվել և շարունակելու է պայքարել ազատամարտիկների սոցիալական ապահովության հարցերի լուծման ուղղությամբ:
Նշենք, որ Վոլոդյա Ավետիսյանի գլխավորությամբ մի խումբ ազատամարտիկներ Երևանի Ազատության հրապարակում նստացույց էին հայտարարել՝ պահանջելով թոշակների կրկնակի բարձրացում, ազատամարտիկների կարգավիճակի վերաբերյալ օրենքի ընդունում, անժամկետ հավելյալ թոշակ սննդի զամբյուղի մինիմալ չափով, Արցախյան պատերազմում զոհված ազատամարտիկների ընտանիքների անդամների համար անվճար ուսում և կոմունալ ծառայությունների 50 %-ով կրճատում:
Հիշեցնենք նաև, որ Ազատության հրապարակում նստացույց հայտարարած ազատամարտիկները՝ Խաչիկ Ավետիսյանի գլխավորությամբ, օրեր առաջ հայտարարեցին համազգային մոբիլիզացիայի անհրաժեշտության մասին: Նրանք իրենց խաղաքարտերը կբացեն վաղը՝ ժամը 19.00-ին Ազատության հրապարակում կայանալիք հանրահավաքի ժամանակ: