ԱԺ այսօրվա նիստում ԱԺ «Ժառանգություն» խմբակցության պատգամավոր Զարուհի Փոստանջյանն ընդգծեց՝ վստահ է, որ հանրությունը չի վստահում իշխանություններին, քանի որ տարիներ շարունակ այս կամ այն խնդրի լուծման համար տրամադրված գումարները նպատակին չեն ծառայել: Նա նաև հավելեց, որ բանակի կայացման համար մի շարք գումարներ են տրվել, բայց ապրիլյան դեպքերից հետո պարզվել է, որ զենք չկա, երիտասարդ տղաները բահով են պաշտպանում հայրենիքը:
«Հայաստանում 22 հազար ոստիկան կա, այս ոստիկանները 2 միլիոն բնակչության համար ահռելի քանակ են կազմում: Նրանց կրճատման հետևանքով կարող ենք ունենալ բյուջե՝ բանակի խնդիրների համար: Բանտարկյալներ կան, որոնք բյուջեի հաշվին ամեն օր 5000 դրամ են ստանում: Կրճատեք մի քանի անգամ այս գումարը: Ես ձեզ հիմա աղբյուրներ եմ մատնանշում, գնացեք հաշվեք ու կտեսնեք, որ այս աղբյուրները լիարժեք բավարար են այդ հիմնադրամի համար, եթե ձեր նպատակը անկեղծ է, արդար է, ապա այդտեղից վերցրեք»,- նշեց Զ. Փոստանջյանը:
Պաշտպանության նախարարն արձագանքեց. «Հայտնի հումորիստ Արկադի Ռայկինը ասում էր, որ եթե բալերինայի ոտքին դինամո կապվի, ապա պտտվելու ընթացքում շատ հոսանք կարող է արտադրել: Ես չեմ կարծում, որ բանտարկյալներին ազատելով՝ բյուջեում փող են խնայում կամ մարդուն ազատում են՝ փող շահելու համար: Դուք որպես պատգամավոր, կարող եք ունենալ ցանկացած երևակայություն: Ուրախ եմ, որ փոքրամասնություն ներկայացնող ֆրակցիա եք նման երևակայությամբ»:
