Հայաստանի տարածքում մեր ժողովրդի պատմության ականատես հանդիսացող հարյուրավոր հնավայրեր այսօր գտնվում են բարձիթողի վիճակում: Ներկայիս սերնդի պարտքն է ապահովել պապերի ժառանգության փոխանցումը հաջորդ սերունդներին:
Ինչպես հաղորդվել էր ավելի վաղ, «Ճանաչիր քո երկիրը» երիտասարդական նախաձեռնությունը իրականացնում է «Մաքրե՛նք հնավայրերը ժամանակակից աղբից» ակցիան, որի շրջանակներում շաբաթը մեկ նախաձեռնության անդամները մեկնում են Հայաստանի տարբեր մարզերում գտնվող հնավայրեր և մաքրում դրանց շրջակա տարածքը կենցաղային աղբից: Ակցիան իրականացվում է մասնակիցների անձնական միջոցներով:
Նախօրեին՝ մայիսի 22-ին, երիտասարդները մեկնել էին Վայոց Ձորի մարզի Շատինավանք համալիր (X դ.): Երբեմնի հռչակավոր սրբատեղին համապատասխան մարմինների անտարբերության պատճառով այսօր աղետի շեմին է հայտնվել: Շատին գյուղի բնակիչների խոսքերով՝ դրա վիճակը տարեցտարի վատթարանում է: «Ճանաչիր քո երկիրը» երիտասարդական նախաձեռնության անդամները իրենց ուժերին ներածի չափով ազատեցին Շատինավանքը կուտակված աղբից, սակայն հուշարձանի պահպանման խնդիրը պետական համապատասխան մարմինների և Մայր աթոռ Սբ. Էջմիածնի մասնագետների հոգածության կարիքն է զգում:
«Մաքրե՛նք հնավայրերը ժամանակակից աղբից» հաջորդ ակցիան տեղի կունենա մայիսի 29-ին: Կո՛չ ենք անում բոլորին միանալ նախաձեռնությանը՝ զանգահարելով (091) 60-07-44 հեռախոսահամարով:
Միասին պահպանե՛նք մեր պատմությունը:
«Ճանաչիր քո երկիրը» երիտասարդական նախաձեռնությունը կազմավորվել է հայ երիտասարդության շրջանում հանրահայտ «Արշավներ» հայրենաճանաչողական խմբի հենքի վրա: Այն կոչված է համախմբել հայ երիտասարդությանը՝ հայրենիքին պիտանի լինելու, Հայաստանի պատմությունն առանց խեղաթյուրումների ճանաչելու գաղափարների շուրջ: «Ճանաչիր քո երկիրը»-ն բացառապես երիտասարդների նախաձեռնությունն է, քաղաքականապես լիովին անկախ է և իր ապագա գործունեության ընթացքում չի պատրաստվում հարել որևէ քաղաքական ուժի:
«Ճանաչիր քո երկիրը» երիտասարդական նախաձեռնության մամուլի պատասխանատու Անուշ Սմբատյան
