Երկու օր է՝ Երուսաղեմի նորընտիր հայոց պատրիարք Նուրհան արքեպիսկոպոս Մանուկյանի նամակը՝ ուղղված Ն.Ս.Օ.Տ.Տ. Ամենայն հայոց կաթողիկոս Գարեգին Բ-ին, լայն քննարկման առարկա է դարձել: Նամակում պատրիարքը տարակուսանք է հայտնում Ֆրանսիայի թեմի առաջնորդ Նորվան արքեպիսկոպոս Զաքարյանի հրաժարականի վերաբերյալ:
«Ինչպե՞ս կարելի է եկեղեցու իշխանավորին անտեսել հանուն մի պարզ քահանայի»,- ասում է պատրիարքը նամակում:
Նա նամակում նշում է, որ տարիներ անց համոզվել է, որ վեհափառ հայրապետին ավելի հետաքրքրում են արտաքինն ու նյութականը: Նուրհան սրբազանը նաև մտահոգություն է հայտնում, որ ավելի շատ կարիք կա մաքրակրոն և զարգացած եկեղեցականների, քան գարշապար լիզողների:
Կոստանդնուպոլսի հայոց պատրիարքության Պատրիարքական ընդհանուր փոխանորդ Տ. Արամ արքեպիսկոպոս Աթեշյանը թեև ծանոթ է նամակի բովանդակությանը, սակայն իր դիրքորոշումը չի ուզում հայտնել: Նա նշեց, որ ոչ մի կարծիք չի ուզում հայտնել, հրաժարվում է դիրքորոշում հայտնելուց:
Նա նշեց, որ Գերագույն հոգևոր խորհուրդը Տ. Նորվան արքեպիսկոպոս Զաքարյանի հրաժարականի գրությանը տեղյակ է: