«Առաջին լրատվական»-ը 2011 թ. մայիսի 6-ին տեղեկացրել էր, որ ԱԱԾ աշխատակիցները ձերբակալել են ԱԺ պատգամավոր Լևոն Սարգսյանի (Ալրաղացի Լյով) «Գայդ» թիկնապահին։
Նույն օրը, Կենտրոն-Նորք Մարաշ առաջին ատյանի դատավոր Մխիթար Պապոյանի նախագահությամբ դատական դռնփակ նիստում դատարանը բավարարել է քննչական մարմնի միջնորդությունը, և Արմեն Սարգսյանի նկատմամբ որպես խափանման միջոց կիրառել էր երկամսյա կալանքը։ Դատարանից կասկածյալը տեղափոխվել էր ԱԱ ծառայության մեկուսարան։
«Առաջին լրատվականը» հայտնել էր նաև, որ Արմեն Սարգսյանը ԱԺ պատգամավոր Լևոն Սարգսյանի հովանավորությամբ տարիներ շարունակ զբաղվել է մաքսանենգ մեքենաների ներկրմամբ՝ Հայաստանյան շուկայում զբաղեցնելով մաքսանենգ մեքենաների առաջատար դիրքերից մեկը։
Այսօր «Առաջին լրատվական»-ին հաջողվեց պարզել, որ անցյալ շաբաթավերջին ԱԱԾ աշխատակիցները Երևանում հայտնաբերել են Արմեն Սարգսյանի կողմից ապօրինի ճանապարհով ձեռք բերված Bentley և Mercedes G class ավտոմեքենաներ։ Ընդ որում, հետաքրքրական է, որ Bentley ավտոմեքենան պատկանում է ՀՀ ոստիկանության քննչական գլխավոր վարչության պետի տեղակալ Արսեն Ղազարյանի հորեղբոր որդուն՝ Արսեն Ղազարյանին։
ԱԱԾ աշխատակիցները պարզել են, որ ավտոմեքենաները ոչ միայն մաքսանենգ ճանապարհով են հասցվել Հայաստան, այլև դրանք գողացված են եղել Եվրոպայի տարբեր երկրներում։