Նախատեսվում է ապահովագրական համակարգ ներդնել, նախատեսվում է մարտական գործողությունների հետևանքով զոհվածների ընտանիքների և հաշմանդամ դարձած անձանց համար ֆոնդ ձևավորել: Այս մասին այսօր լրագրողների հետ զրույցում ասաց ՀՀ աշխատանքի և սոցիալական հարցերի նախարար Արտեմ Ասատրյանը՝ հավելելով, որ դա կնպաստի նշված անձանց լիարժեք և ամբողջական սոցիալական երաշխիքների կարգավորմանը:
«Կարծում եմ, որ ցանկացած ապահովագրական համակարգ ենթադրում է համապատասխան վճարումներ, իսկ ամենակարևոր սկզբունքը, որն առաջարկվում է ներկայացված նախագծով, հնարավորինս ներդնել գումարներ, կառավարման միջոցով ավելացնել այդ գումարները», – նշեց Արտեմ Ասատրյանը:
Հարցին, թե դա սոցիալական բեռ չէ՞ ցածր աշխատավարձ ստացողի համար, Արտեմ Ասատրյանն արձագանքեց. «Ինչը վերաբերում է նվազագույն աշխատավարձ ստացողներին, այդ մասով բեռը չի կարող ընկնել քաղաքացիների վրա, իսկ մնացած աշխատավարձերի միջակայքերում նախատեսված է վճարը 1000 դրամի չափով»:
Դիտարկմանը, թե ինչու պետք է ցածր աշխատավարձ ստացողից էլ, մեկ միլիոն դրամ աշխատավարձ ստացողից էլ նույն գումարը գանձվի, կամ ինչու որոշում չի կայացվել պաշտոնյաների աշխատավարձից ավելի շատ պահումներ կատարել՝ ֆոնդին փոխանցելու համար, Արտեմ Ասատրյանը պատասխանեց. «Դրանք մոտեցումներ են, որոնք կարող են քննարկումների փուլ անցնել»:
Մանրամասները՝ տեսանյութում:
