Շախմատի աշխարհի 13-րդ չեմպիոն, ներկայումս Ռուսաստանում ընդդիմադիր գործունեությամբ զբաղվող Գարի Կասպարովը երեկ հարցազրույց է տվել Turan գործակալությանը, որում անդրադարձել է ղարաբաղյան հակամարտությանը: Նրա հարցազրույցի մի հատվածը մեջբերել է «Ազատության» ռադիոկայանի ադրբեջանական ծառայությունը:
Այն հարցին, թե Ադրբեջանում կարծիք կա, որ Գարի Կասպարովը Ադրբեջանին թշնամի չէ, սակայն բարեկամ էլ չէ, նա պատասխանել է. «Ամեն ինչ այդքան էլ միանշանակ չէ: Ուղղակի պետք է հիշել, որ ես մարդ եմ, որը ծնվել և մեծացել է Բաքվում, վերապրել է 1990թ. հունվարը (հայկական ջարդեր.– 1in.am), և ես ունեմ բազմաթիվ բարեկամներ, որոնք նույնն են վերապրել և հիմա ապրում են տարբեր վայրերում: Այս ամենը չէր կարող իր հետքը չթողնել, սակայն ես չեմ մոռանում, որ իմ կյանքի մի զգալի մասն ապրել եմ Բաքվում»,- ասել է շախմատի աշխարհի չեմպիոնը:
Ղարաբաղյան հակամարտության առնչությամբ նա ասել է, որ «դեմ է բռնությանը և դեմ է եղել միշտ»: «Ես դեմ եմ եղել այդ շարժմանը հենց սկզբից: Եվ ես ցանկանում եմ, որպեսզի ինձ ճիշտ հասկանան: Ես ինտեգրման կողմնակից եմ, խնդիրների խաղաղ կարգավորման՝ հաշվի առնելով կողմերի շահերը: Այդ պատճառով ես դեմ եմ ռազմական ճանապահով այս խնդրի լուծմանը, և եթե պատերազմ սկսվի, ես դրան դեմ արտահայտվելու»,- ասել է Կասպարովը:
Նա ավելացրել է, որ ինքը չունի այս խնդրի լուծման դեղատոմս և հասկանում է, որ նմանատիպ լուրջ հակամարտությունների լուծումը արագ և հեշտ չի լինում: «Երևի որոշ ժամանակ պետք է անցնի, և նոր սերունդ գա: Երկու կողմերում էլ մարդիկ պետք է համաձայնեն, որ 1988-1994 թթ. եղածը պետք է պատմություն դառնա»:
«Ես կարծում եմ, որ այս հակամարտությունը երկար տևեց, որովհետև կենտրոնական իշխանությունը (ԽՍՀՄ.- 1in.am) միշտ օգտագործել է այս իրադարձությունները սեփական նպատակների համար: Չմոռանանք, որ կայսրությունը քանդվում էր, և կենտրոնը օգտագործում էր դա, ինչպես և հակամարտություններն Աբխազիայում, Օսիայում և Մերձդնեստրում, որեպսզի թույլ չտա ԽՍՀՄ փլուզումը»,- հայտարարել է Կասպարովը:
Խոսելով հակամարտության կարգավորման մասին՝ նա ասել է, որ այն օգտագործվում է և՛ Հայաստանի, և՛ Ադրբեջանի իշխանությունների կողմից ներքին խնդիրներում և հանուն հարստացման: «Այդ պատճառով ժողովրդավար Ադրբեջանը խնդրի լուծմանն ավելի մոտ կլինի, քանի հիմա է: Ես կարծում եմ՝ Հեյդար Ալիևի պատգամն Իլհամին եղել է հետևյալը՝ սպառնա պատերազմով, սակայն մի՛ պատերազմիր: Եվ նա չի սկսելու պատերազմ»,- ասել է Կասպարովը:
Նա այս համոզման է, քանի որ եթե պատերազմ սկսեց և հաղթեց, ապա չի կարողանալու հետո սեփական ժողովրդին բացատրել, թե ինչու է թալանում:
Նույնն էլ, ըստ շախմատի վարպետի, Երևանում է. «Երևանում էլ իշխանության գլուխ մարդիկ են, որոնք վերևում են հայտնվել շնորհիվ պատերազմի, և նրանք նույնպես ցանկանում են մնալ իշխանության: Այդ պատճառով կարգավորումը կարող է լինել ռեալ, երբ քաղաքական բեմից կգնան ներկայիս էլիտաները, և ժողովրդավարության մասին այլ պատկերացումներով մարդիկ կգան»,- եզրակացրել է նա:
