«Էկոլոգիական անվտանգության ապահովման և ժողովրդավարության զարգացման» հասարակական կազմակերպությունը ԵԱՀԿ երևանյան գրասենյակի աջակցությամբ Սյունիքի մարզում իրականացնում է «Հանքարդյունաբերական ընկերությունների աշխատակիցների իրավունքների պաշտպանության միություն» ծրագիրը: Մեկնարկած ծրագրով նախատեսվում է մարզում ստեղծել մի «Միություն», որը կզբաղվի հանքարդյունաբերական ընկերությունների աշխատակիցների իրավունքների, շահերի պաշտպանությամբ:
Ծրագրի շրջանակներում, մեր կազմակերպությունը հուլիսի 15-ին դիմել էր «Դանդի փրիշս մեթալս Կապան» ՓԲԸ գլխավոր տնօրեն Հրաչ Ջաբրայանին և ընկերության արհեստակցական միության նախագահ Արսեն Հայրապետյանին՝ օգոստոսի 8-ին ընկերությունում ղեկավարության, աշխատակիցների, արհմիության ներկայացուցիչների հետ հանդիպելու և հետագա հնարավոր համագործակցության շուրջ քննարկում կազմակերպելու նպատակով: Սակայն, «Դանդի փրիշս մեթալս Կապան» ՓԲԸ գլխավոր տնօրեն Հրաչ Ջաբրայանից ստացվել է մերժողական պատասխան: Գլխավոր տնօրենը պատասխան նամակում նշել է, որ դեմ է ընկերության աշխատակիցների հետ կապված վերոնշյալ խնդիրները քննարկել մեր ծրագրի անձնակազմի հետ, պատճառաբանելով, որ նման հարցերում կողմնակի կառույցների միջամտությունն ընդունելի չէ իրենց համար:
«Էկոլոգիական անվտանգության ապահովման և ժողովրդավարության զարգացման» հասարակական կազմակերպության նախագահ Ռաֆայել Ասրյանը տեղեկացնում է, որ «Դանդի փրիշս մեթալս Կապան» ՓԲԸ արհեստակցական միության նախագահ Արսեն Հայրապետյանին ուղղված իրենց նամակը մինչ օրս անպատասխան է մնացել:
Ստորև ներկայացնում ենք «Էկոլոգիական անվտանգության ապահովման և ժողովրդավարության զարգացման» հասարակական կազմակերպության նախագահ Ռաֆայել Ասրյանի նամակը ուղղված «Դանդի փրիշս մեթալս կապան» ՓԲԸ գլխավոր տնօրեն պարոն Հրաչ Ջբրայանին:
«Հարգելի պարոն Ջաբրայան,
«Էկոլոգիական անվտանգության ապահովման և ժողովրդավարության զարգացման» հասարակական կազմակերպությունը ԵԱՀԿ երևանյան գրասենյակի աջակցությամբ Սյունիքի մարզում իրականացնում է «Հանքարդյունաբերական ընկերությունների աշխատակիցների իրավունքների պաշտպանության միություն» ծրագիրը: Ծրագիրը նպատակ ունի ստեղծելու Միություն, որը կզբաղվի հանքարդյունաբերական ընկերությունների աշխատակիցների իրավունքների, շահերի պաշտպանությամբ: Նշենք, որ հանքարդյունաբերական ընկերությունների աշխատակիցների իրավունքների պաշտպանությունը մշտապես եղել է մեր կազմակերպության ուշադրության կենտրոնում, որոնց ուղղությամբ բազմաթիվ ծրագրեր են իրականացվել մինչ օրս:
Հաշվի առնելով այն հանգամանքը, որ «Դանդի փրիշս մեթալս Կապան» ՓԲ ընկերությունում կարևորություն է տրվում ընկերության աշխատակիցների խնդիրների լուծման ու իրավունքերի պաշտպանության հարցերին, «Հանքարդյունաբերական ընկերությունների աշխատակիցների իրավունքների պաշտպանության միություն» ծրագրի անձնակազմն օգոստոսի 8-ին ժամը 11-ին մտադիր է այց կատարել «Դանդի փրիշս մեթալս Կապան» ՓԲԸ` հանդիպելու ընկերության տնօրինության, աշխատակիցների, արհմիության ներկայացուցիչների հետ` հետագա հնարավոր համագործակցության շուրջ քննարկում կազմակերպելու նպատակով: Մեր կողմից նշված հանդիպման օրը Ձեզ հարմար չլինելու դեպքում, պատրաստ ենք այց կատարել Ձեր կողմից առաջարկվող և ընկերության աշխատանքային գրաֆիկին հարմարեցված մեկ ուրիշ աշխատանքային օրվա ընթացքում, որի մասին խնդրում ենք նախապես տեղեկացնել»:
