Օգոստոսի 2-ից Ազգային ժողովում շրջանառության մեջ է դրվել «Կանանց և տղամարդկանց հավասար իրավունքների և հավասար հնարավորությունների ապահովման մասին» օրենքում փոփոխություն կատարելու մասին «Բարգավաճ Հայաստան» խմբակցության քարտուղար Նաիրա Զոհրաբյանի հեղանակած օրինագիծը:
Ըստ պատգամավորի՝ օրենսդրական նախաձեռնությունը նպատակ ունի առավել հստակեցնել օրենքում օգտագործվող եզրույթները՝ տարբեր սեռերի անձանց համար գործող օրենքով ամրագրված ձևակերպումները տարաբնույթ մեկնաբանություններից զերծ պահելու նպատակով:
Նշենք, որ այս տարվա մայիսի 20-ին ընդունված օրենքում «գենդեր, գենդերային» հասկացությանը տրված է հետևյալ սահմանումը. «տարբեր սեռի անձանց ձեռքբերովի, սոցիալապես ամրագրված վարք, կանանց և տղամարդկանց միջև հարաբերությունների սոցիալական հայեցակետ, որն արտահայտվում է հասարակական կյանքի բոլոր ոլորտներում, ներառյալ` քաղաքականությունը, տնտեսությունը, իրավունքը, գաղափարախոսությունը, մշակույթը, կրթությունը, գիտությունն ու առողջապահությունը»:
Ն.Զոհրաբյանի հիմնավորմամբ՝ գործող օրենքում «սեռ» եզրույթին տրվում է «իրավական ձևակերպում և այն ամրագրում է որպես ձեռքբերովի և սոցիալապես ամրագրված վարք, այնինչ՝ սա ի սկզբանե բնության մեջ առկա երկու տարբեր սեռերի՝ տղամարդկանց և կանանց միջև հարաբերությունների հայեցակետն է»:
Օրենսդրական նախաձեռնության հեղինակը գտնում է, որ գործող օրենքում առկա այս ձևակերպումը իրավացիորեն լրջագույն քննադատության է արժանացել հասարակական տարբեր շերտերի կողմից։ Ավելին, նախագծի հանրային և խորհրդարանական քննարկումների, ինչպես նաև նախագծի նախնական տարբերակում նման ձևակերպում օգտագործված չի եղել։
Ըստ Ն.Զոհրաբյանի, վերջինս կարող է տարաբնույթ, մեր ազգային նկարագրին ոչ հարիր մեկնաբանությունների տեղիք տալ, ուստի նա առաջարկում է «գենդեր գենդերային» հասկացությունը վերաշարադրել նոր խմբագրությամբ. «կանանց և տղամարդկանց միջև հարաբերությունների սոցիալական հայեցակետ, որն արտահայտվում է հասարակական կյանքի բոլոր ոլորտներում, ներառյալ՝ քաղաքականությունը, տնտեսությունը, իրավունքը, գաղափարախոսությունը, մշակույթը, կրթությունը, գիտությունն ու առողջապահությունը»:
