ԱՄՆ նախագահ Բարաք Օբաման Հայաստանում ԱՄՆ դեսպանի պաշտոնում մտադրվել է առաջադրել Ջոն Հեֆերնին:
ՀՅԴ հայ դատի և քաղաքական հարցերով գրասենյակի պատասխանատու Կիրո Մանոյանը «Առաջին լրատվականի» հետ զրույցում նկատեց, որ իրենք դեռևս չեն կարող որևէ բան ասել այս թեկնածուի մասին, քանզի տեղյակ չեն նրա գործունեությանը: Մանոյանը նշեց, որ ԱՄՆ գործն է դեսպան նշանակելը, և այստեղ պետք է ակտիվորեն աշխատի Ամերիկայի հայ դատի հանձնախումբը, որն արդեն Հեֆերնի թեկնածության վերաբերյալ հայտարարություն է տարածել:
Տեղեկացնենք, որ Ամերիկայի հայկական համագումարի ղեկավար Արամ Համբարյանը, մեկնաբանելով Հեֆերնի թեկնածությունը, նշել է, որ իրենք ուսումնասիրելու են, թե արդյոք Հեֆերնը պատրաստ է իր սկզբունքային դիրքորոշումը հայտնելու Հայոց ցեղասպանության և հայ-ամերիկյան երկկողմանի շահավետ հարաբերությունների հարցերում:
Համագումարը նաև հույս է հայտնել, որ Հեֆերնը կտա այդ բացատրությունները և կներկայացնի ամերիկյան տեսակետը ոչ միայն Հայոց ցեղասպանությունը և դրա հետևանքները ճանաչելու անհրաժեշտության առումով, այլև կզբաղվի Լեռնային Ղարաբաղի Հանրապետության դեմ Ադրբեջանի ագրեսիայի հարցով` տարածաշրջանում խաղաղություն ապահովելու նպատակով:
Համագումարը նաև հիշեցրել է Հեֆերնի հակահայկական կեցվածքի մասին և ընդգծել, որ վերջինս թուրքամետ գործունեություն ծավալած կոնգրեսական Բիրեյտրի օգնականն է եղել:
