Վարչապետ Կարեն Կարապետյանը խորհրդարանին ներկայացնելով 2017 թվականի բյուջեի նախագիծը՝ հայտարարել է, որ 2017 թվականի համար փորձելու են ներկայացնել տնտեսական գործունեության նոր պլատֆորմ, որպեսզի գործարարը մաքսիմալ չճնշվի և կարողանա վերարտադրվել:
Հասկանալի է, թե ինչ է ասում Կարապետյանը: Նա ըստ էության արձանագրում է, որ չեն փորձելու գործարարության հետ հարաբերություններում գերնպատակ դնել հարկային հավաքագրումները, որպեսզի գործարարները չզրկվեն ռեսուրսներից և գեներատիվ հնարավորություններից: Սակայն 2017 թվականի համար կա ոչ միայն գործարարների վերարտադրության հնարավորությունների, այլ նաև իշխանության վերարտադրության խնդիր: Ինչքանով են այս խնդիրները իրար հետ համատեղելի:
Եթե խոսքը վերաբերում է այն գործարարների տնտեսական վերարտադրողականության կարողությանը, որոնք հենց իշխանություն են, ապա այստեղ ամեն ինչ պարզ է, և իսկապես՝ որպեսզի 2017-ին իշխանությունները կարողանան լուծել իրենց վերարտադրման խնդիրը, պետք է կարողանան նաև տնտեսական վերարտադրողականության բարձր մակարդակ ունենալ: Սակայն եթե կառավարության ղեկավարը խոսում է այն բիզնեսի մասին, որը իշխանական շրջանակներից չէ, որը հովանի չունի, չի օգտվում որևէ իշխանական կամ իշխանամերձ լծակներից և արտոնություններից, ապա այստեղ առաջանում է որոշակի կազուս:
Բանն այն է, որ այդ բիզնեսը վերարտադրողականություն կարող է ունենալ այն դեպքում միայն, երբ արտոնություններ չունենան այն բիզնեսները, որոնք սերտաճած են իշխանության հետ: Սակայն եթե այդ բիզնեսներն էլ արտոնություններ չունենան, ապա արդեն վերարտադրման խնդիրներ կունենան իշխանությունները, և 2017-ի ընտրությունները կարող են տապալվել: Այսպիսով՝ առկա է փակ շրջան:
Իսկ եթե խոսքը վերաբերում է վերարտադրողական հնարավորությունները ընդամենը առկա բիզնես-ստատուս քվոյի տրամաբանության շրջանակում հնարավորինս ընդլայնելուն, ապա այստեղ արդեն խոսք կարող է լինել ընդամենը այն մասին, որ կգծվի որոշակի շրջանակ այն գործարարների համար, որոնք իշխանական սերտաճման մեխանիզմի մեջ չեն: Նրանց համար գործունեության տիրույթները որոշակիորեն կարող են ավելացվել, բայց մինչև այնտեղ, որտեղ արդեն բիզնես-իշխանություն սերտաճման տիրույթներն են: Իսկ դա նշանակում է, որ փոփոխությունները և նոր տնտեսական պլատֆորմը կարող են լինել կոսմետիկ:
Օրգանականության հեռանկարի համար բիզնեսին վերարտադրողականության մեծ հնարավորություններ ընձեռող կառավարությունը հասարակությանը համոզիչ լինելու համար պետք է նաև նույնքան համոզիչ ցույց տա, որ իշխանության վերարտադրության խնդիր չկա: Կառավարությունը կարո՞ղ է ցույց տալ դա:
Լուսանկարը՝ Photolure-ի