«Արմենիա Թըդեյ» լրատվական կայքի համակարգող Արգիշտի Կիվիրյանի փաստաբաններ Լուսինե Սահակյանը, Արամազդ Կիվիրյանն ու Երվանդ Վարոսյանը բոլոր ատյաններում բողոքարկելու են Ա.Կիվիրյանի նկատմամբ ոստիկանների գործողությունները: Այս մասին «Փաստինֆո»-ին այսօր հայտնել է Արգիշտի Կիվիրյանը:
Նախօրեին նա բերման էր ենթարկվել ոստիկանության Երևանի կենտրոնական բաժին և նրա նկատմամբ կազմվել էր վարչական իրավախախտման արձանագրություն:
Ա.Կիվիրյանը հայտնել է, որ ինքը չի ընդունում այդ վարչական արձանագրությյունը, չի ստորագրել այն, ինքը որևէ օրենք չի խախտել, հանցանք կամ զանցանք չի կատարել: Նախօրեին 12.20-12.25-ի սահմաններում 10-ից ավելի ոստիկաններ բռնություն գործադրելով, ապօրինի կարգով իրեն բերման են ենթարկել ոստիկանություն՝ վնասելով իր գույքն ու մարմնական վնասվածքներ հասցնելով իրեն: Ընդ որում, ոստիկանների կողմից չի բացատրվել, թե դա ինչու է տեղի ունենում. «Դա դասական առևանգում էր, պահանջում եմ, որպեսսզի պատասխանատվության ենթարկվեն բոլոր մեղավոր անձինք»,- ասել է Ա.Կիվիրյանը՝ ի պատասխան մեր հարցի, հավելելով, որ այսօր նա դիմելու է դատաբժշկին:
