Թուրքական Anadolu լրատվական գործակալության փոխանցմամբ՝ Թուրքիայի արտգործնախարար Մևլյութ Չավուշօղլուն Անկարայում Ֆրանսիայի արտգործնախարար Ժան-Մարկ Էյրոյի հետ համատեղ մամուլի ասուլիսի ժամանակ հայտարարել է, որ Թուրքիան թույլ չի տա, որպեսզի PKK-ի զինյալները Իրաքի Սինջար շրջանը վերածեն երկրորդ Ղանդիլի, որտեղ արդեն երկար տարիներ գործում են նրանք.
«Սինջարը չի դառնա երկրորդ Ղանդիլ։ Թուրքիան հետագայում նույնպես PKK-ի դեմ կպայքարի Իրաքի տարածքում և կանի ամեն հնարավոր բան, որպեսզի սահմանային շրջանները դառնան ավելի անվտանգ»։
Չավուշօղլուն ընդգծել է, որ Թուրքիան բազմակողմ ներդրում է ունենում Մոսուլը ԴԱԻՇ-ից ազատագրելու գործողության մեջ։ Նա մանրամասնել է, որ Բաշիքայի ճամբարում թուրք հրահանգիչների պատրաստած Փեշմերգայի մարտիկները մասնակցում են այդ գործողությանը և բացի այդ, Թուրքիայի ռազմաօդային ուժերի F-16 տիպի 4 կործանիչ միջազգային դաշինքի կազմում ռմբակոծում են ԴԱԻՇ-ի օբյեկտները։
Չավուշօղլուն հիշեցրել է, որ Իրաքից ընդունել է մինչև 300.000 փախստականի, ևս 40.000 փախստական գտնվում է Իրաքի հյուսիսում Թուրքիայի ստեղծած 3 ճամբարներում։
