Ինձ անհրաժեշտ է իմ թանկագին ընկերոջ՝ Վլադիմիր Պուտինի աջակցությունը Մերձավոր Արևելքում ճգնաժամի և ահաբեկչության դեմ պայքարելու համար։ Այս մասին հայտարարել է Թուրքիայի նախագահ Ռեջեփ Թայիփ Էրդողանը «Իշխանության բանաձև» հաղորդման ժամանակ, որը հեռարձակվում է «Ռոսսիա-1» հեռուստաալիքով։
Նախագահը նշել է, որ Ռուսաստանի հետ համագործակցության համար Թուրքիան պատրաստ է ձեռնարկել ցանկացած քայլ։ Էրդողանի խոսքով՝ Ռուսաստանը և Թուրքիան երկու բարեկամական պետություններ են տարածաշրջանում։
«Մեր աշխարհում առկա բարդությունները հաղթահարելու համար պետք է կենտրոնանանք խաղաղ գոյակցության վրա։ Գլխավոր արժեքը պետք է լինի մարդը, մարդիկ պետք է ապրեն խաղաղության մեջ։ Մենք իրարից գտնվում ենք ձայնի հեռավորության վրա։ Եթե գոռամ, իմ ձայնը կլսվի Սոչիում, եթե ինձ դիմեն Սոչիից, ես կլսեմ, ահա թե որքան մոտ ենք իրար։ Կարծում եմ պետք է միասին զբաղվենք խաղաղ գործընթացով, լինենք միասնական և համերաշխ»,-ասել է Թուրքիայի նախագահը, իսկ վերջում ռուսերենով շնորհակալություն է հայտնել։
