Վրացական Apsny.ge կայքի փոխանցմամբ, երեկ ՄԱԿ-ի շտաբ-կայանում ՄԱԿ-ի Գլխավոր վեհաժողովի պատվիրակներն ընտրել են Մարդու իրավունքների խորհրդի 15 նոր անդամների: Արևելաեվրոպական երկրների խմբից պայքարում էին Վրաստանը, Ռումինիան ու Չեխիան:
Քվեարկության արդյունքներով Սլովակիան ու Ուկրաինան, որոնց լիազորությունների ժամկետն ավարտվում է այս տարի, իրենց տեղը կզիջեն Ռումինիային ու Չեխիային:
Խորհրդում Արևմտյան Եվրոպան կներկայացնեն Ավստրիան ու Իտալիան, Ասիան` Հնդկաստանը, Ինդոնեզիան, Քուվեյթն ու Ֆիլիպինները:
Աֆրիկյան երկրներից խորհրդի կազմում են ընդգրկվել Բենինը, Բոտսվանան, Բուրկինա Ֆասոն և Կոնգոն, իսկ լատինաամերիկյան երկրներից` Կոստա Ռիկան, Պերուն ու Չիլին:
Ընտրությունները, սակայն, չանցան առանց միջադեպերի: Թեև Սիրիան նախապես քվեարկությունից հանեց իր թեկնածությունը, այնուամենայնիվ նա ստացավ 5 քվե: Սակայն դա բավարար չեղավ ՄԱԿ-ի հիմնական իրավապաշտպան մարմնում տեղ զբաղեցնելու համար:
Հիշեցնենք, որ Մարդու իրավունքների խորհուրդն ունի 47 անդամ, որոնք ընտրվում են եռամյա ժամկետով: Այդ մանդատները բաշխված են աշխարհագրական տարածաշրջաններին համապատասխան.
աֆրիկյան երկրներին հատկացված է 13 տեղ, ասիական երկրներին` նույնպես 13 տեղ, արևելաեվրոպական երկրներին` 6 տեղ, Լատինական Ամերիկայի ու Կարիբյան ավազանի երկրներին` 8 տեղ, արևմտաեվրոպական և այլ երկրներին` 7 տեղ:
Ներկայիս դրությամբ, հետխորհրդային երկրներից խորհրդի կազմում ընդգրկված են միայն Ռուսաստանը, Մոլդովան ու Ղրղզստանը:
