Հայաստանին ուղղված ՌԴ հնարավոր պատժամիջոցները էականորեն կանդրադառնան տնտեսության վրա: Այս մասին այսօր «Առաջին լրատվական»-ի հետ զրույցում ասաց ԱԺ 4-րդ գումարման պատգամավոր, տնտեսագիտության դոկտոր, պրոֆեսոր Վարդան Բոստանջյանը: Նա նշեց, որ ներկայումս աշխարհում պայքարում են ազդեցության գոտիների համար, իսկ ռուսական ազդեցության գոտիները դեռևս կենտրոնացված կառավարման տարիներից հայտնի էին: Այս պահին՝ ի դեմս նորանկախ պետությունների, ստացվել է մի զարգացում, ըստ որի՝ յուրաքանչյուրն ուզում է գտնել իր տեղն աշխարհում: Բոլոր պարագաներում նրանք, դեռևս լինելով ոչ բավականաչափ ուժեղ, ենթակա են ճնշումների գերկառավարողների կողմից: Ըստ Վ. Բոստանջյանի՝ ի դեմս Ասոցացման համաձայնագրի, որը պատրաստվում են ստորագրել վեց երկրներ, այդ թվում՝ Ուկրաինան և Հայաստանը, ԵՄ-ն ունի լուրջ ցանկություն դեպի իր ազդեցության գոտի տեղաշարժելու այս երկրներին, բնականաբար, ՌԴ-ն էլ այս պարագայում փորձում է այդ բանը թույլ չտալ, և հիմա դիմադրություն է գնում:
«Այս պրոցեսում բոլոր դեպքերում Ասոցացման համաձայնագրի ստորագրումը միգուցե դեռևս վերջնականորեն խնդիրը չի լուծում, բայց, այդուհանդերձ, ստեղծում է նախադրյալներ՝ հետագայում ՌԴ-ի ազդեցության գոտիները կորցնելու համար: Ինչ վերաբերում է այս միտումները կանխելուն, ՌԴ-ն գործադրելու է ճնշումներ և եթե հիմա այդ ճնշումներն արտահայտվում են տարբեր տնտեսական սանկցիաների ձևով Ուկրաինայի նկատմամբ, իսկ Հայաստանը իր հզորությամբ, կարողությամբ և բազմաթիվ այլ հատկություններով Ուկրաինա չէ: Բացի այդ՝ առանց այն էլ Հայաստանը հայտնվել է մի իրավիճակում, երբ անվտանգությունը, գոնե հիշելի հեռանկարում, այլընտրանք չունի, անվտանգության առումով կարող ենք ապավինել միայն ՌԴ-ին: Փաստորեն ՀՀ էներգետիկան պատկանում է ռուսներին, երկաթգծային տրանսպորտը պատկանում է ռուսներին, հեռահաղորդակցությունը պատկանում է ռուսներին, և ստացվում է, որ հիմնական մագիստրալ ուղղությունները, որով մենք հնարավորություն ունենք զարգանալու, պատկանում են ռուսներին: Սա արդեն իսկ ազդեցություն է, և անհրաժեշտության դեպքում այդ ազդեցության ամպլիտուդը կբարձրանա»,- մեկնաբանեց Վարդան Բոստանջյանը՝ հավելելով, որ Ռուսաստանի կողմից հնարավոր տնտեսական պատժամիջոցները կանդրադառնան հայաստանյան տնտեսության մեծ տոկոսի վրա, քանի որ ՀՀ-ն մեծ կախվածության մեջ է ՌԴ-ից:
Հիշեցնենք, որ Ռուսաստանի դաշնության «Ռոսպոտրեբնադզոր»-ի ղեկավար Գենադի Անիշչենկոն «Ինտերֆաքսին» հայտնել էր, որ ուկրաինական խոշորագույն հրուշակեղեն արտադրող «Ռոշեն» ընկերության արտադրանքի ներմուծումը Ռուսաստան արգելվել է որակական որոշակի խնդիրների պատճառով: Սակայն սրանք ընկալվում են որպես ռուսական տնտեսական պատժամիջոցներ՝ ուղղված Ուկրաինային, ԵՄ Ասոցացման համաձայնագրին ընդառաջ: