Գյումրիում այսօր՝ հոկտեմբերի 10-ին, գումարվել է քաղաքի ավագանու անդրանիկ նիստը: Նիստը բոյկոտել են երեք կուսակցությունների ` ԲՀԿ-ի, ԳԱԼԱ-ի և «Հայկական վերածնունդ»-ի ավագանու անդամները:
Թեմայի շուրջ «Առաջին լրատվական»- ի հետ զրույցում քաղաքագետ Գագիկ Համբարյանը նշեց՝ ավագանու նիստը երեք քաղաքական ուժերի բոյկոտելը ցույց է տալիս, որ իրավիճակը նորմալ չէ և մտածելու տեղիք է տալիս ՏԻՄ-երին, մասնավորապես քաղաքապետ ընտրված Սամվել Բալասանյանին: «Ընտրությունից հետո հաշվարկը ցույց է տալիս, որ մենք ունենք խայտառակ ընտրահամակարգ, ես չգիտեմ, թե ով է այս ամենի հեղինակը, բայց ամեն ինչ արված է, որ իշխանությունները վերընտրվեն, նույնիսկ այն դեպքում, երբ որ ընտրությունների մասնակցած ընտրողների 66 տոկոսը դեմ է քվեարկել այդ քաղաքական ուժին: Սա սրացնում է իրավիճակը»,- նշեց Գ. Համբարյանը:
Քաղաքագետի դիտարկմամբ՝ բոյկոտելով ոչ մի բանի չեն հասնի, դա ամենասխալ տարբերակն է: «Չգիտեմ՝ դատական գործընթացը շատ արագ կհասնի Եվրոպական դատարան, թե չէ, որովհետև այն կարող է 2-3 տարի ձգվել, բայց բոյկոտելն ուղղակի նվեր է իշխանությանը»,-նշեց Գ. Համբարյանը՝ հավելելով, որ այսօրվա նիստը ֆարս էր, պետք չէր մասնակցել, բայց այսուհետ պետք է մասնակցել և հակակշռել իշխանությանը:
Վանաձորում տեղի ունեցած քաղաքապետի ընտրությունների վերաբերյալ քաղաքագետը նշեց. «ՀՀԿ-ին չպետք է մեղադրել. Մարուքյանին պաշտպանող ուժերը ծախվեցին»:
Մանրամասները՝ տեսանյութում:
